Qaynarinfo portalından verilən məlumata əsasən, ain.az bildirir.
Almaniya ordusu döyüş şəraitində qərarların qəbulunu sürətləndirmək üçün süni intellekt alətlərindən istifadə etməyi planlaşdırır. Bu sistemlər döyüş meydanından gələn məlumatları insandan daha sürətli təhlil edə bilir.
Qaynarinfo xəbər verir ki, "Reuters” agentliyinin məlumatına görə, hərbçilər Ukraynanın və digər orduların təcrübəsini fəal şəkildə öyrənir. Quru qoşunlarının komandanı Kristian Froyndinq bildirib ki, o, Ukraynadakı komanda məntəqələrinə səfərlərindən sonra mühüm nəticələr əldə edib. Onun sözlərinə görə, dronlar və müasir sensorların istifadəsi döyüş meydanından toplanan məlumatların həcmini kəskin artırıb.
"Ukraynalılar dörd illik müharibə ərzində toplanmış məlumatlardan istifadə edirlər. Bu məlumatlar əsasında süni intellekt düşmənin oxşar vəziyyətlərdə necə davrandığını müəyyən edə və əks-tədbirlər təklif edə bilər”, deyə o qeyd edib.
General vurğulayıb ki, hazırda yüzlərlə hərbçi və bir neçə gün tələb edən tapşırıqlar süni intellekt vasitəsilə xeyli daha sürətli icra oluna bilər. Onun sözlərinə görə, yalnız ənənəvi üsullarla "rəqibin qərarvermə dövrünü qırmaq” mümkün deyil.
Froyndinq Ukraynadan və Bundesverin təlimlərindən əldə olunan məlumatların analitik sistemlərin öyrədilməsi üçün istifadə olunmasını təklif edib. Eyni zamanda bu sistemlərin Almaniyanın əməliyyat prinsiplərinə uyğun olması vacib hesab edilir.
General etik məsələlərə toxunaraq bildirib ki, süni intellekt yalnız məsləhətçi rolunu oynayacaq.
"Qərarların qəbulu həmişə insanın – hərbçinin öhdəsində qalacaq”, deyə o vurğulayıb. O əlavə edib ki, konkret texnologiya hələ seçilməyib, lakin bu istiqamət prioritet hesab olunur.
O, həmçinin bu cür sistemlərin NATO standartlarına uyğunlaşdırılmasının vacibliyini qeyd edib. Avropa həlli yaradılması mümkündür, lakin ABŞ texnologiyaları hazır vəziyyətdə olması baxımından üstünlük qazana bilər.
"Şəxsən mən belə bir sistemin mümkün qədər tez tətbiq edilməsini vacib hesab edirəm. Bununla yanaşı, məlumat suverenliyi və təhlükəsizlik məsələləri də nəzərə alınmalıdır”, deyə Froyndinq bildirib.
Qeyd olunur ki, ABŞ ordusu artıq "Palantir Technologies” şirkəti tərəfindən hazırlanmış "Maven” adlı alətdən istifadə edir. Bu sistem foto və videolar da daxil olmaqla döyüş meydanından gələn məlumatları emal edərək situasiya barədə məlumatlılığı artırır və qərarların qəbulunu sürətləndirir.
Aydın
Ən son xəbərləri və yenilikləri almaq üçün ain.az saytını izləyin.
