ABŞ və İsrailin silsilə zərbələrindən sonra İranda daxili siyasi müstəvidə nüvə silahının yaradılması ilə bağlı müzakirələr kəskinləşib. SEPAH da daxil olmaqla, ölkədəki “sərt xətt” tərəfdarları rəsmi Tehranın nüvə doktrinasına yenidən baxılmasını və Nüvə Silahlarının Yayılmaması Müqaviləsindən (NPT) çıxmağı açıq şəkildə tələb edirlər.
Əvvəllər bu addım yalnız Qərbə qarşı təzyiq aləti kimi istifadə olunsa da, hazırda real fəaliyyət planı kimi gündəmə gətirilir. Tehran rəsmiləri nüvə silahı iddialarını dini qadağalara istinad edərək təkzib etsələr də, Ali Rəhbərin ölümündən və Əli Laricani kimi mülayim siyasətçilərin sıradan çıxmasından sonra radikalların mövqeyi ciddi şəkildə güclənib.
KONKRET.az xəbər verir ki, analitiklər İranın artıq “nüvə astanasında olan dövlət” statusundan real istehsal mərhələsinə keçdiyini ehtimal edirlər. Ölkənin mövcudluğuna yönəlmiş təhdidlərin artması fonunda, nüvə silahına sahib olmaq Tehrandakı hakim elita üçün yeganə təhlükəsizlik qarantı kimi görünür. Hətta Ali Rəhbər vəzifəsinə mümkün namizəd olan Müctəba Xameneyinin hələlik bu barədə susması radikalların fəaliyyət imkanlarını genişləndirir. İsrail tərəfi isə İranın infrastrukturuna vurulan ağır zərbələrə baxmayaraq, Tehranın nüvə başlığı hazırlamağa cəmi bir neçə ay qaldığını bəyan edib.
Natiq Səlim,
KONKRET.az
