Ukraynanın son günlər Rusiyanın neft infrastrukturuna endirdiyi zərbələr Moskvanın neft ixrac imkanlarına son dörd ilin ən ciddi zərbəsi kimi qiymətləndirilir.
Bizim.Media xəbər verir ki, bu barədə The Telegraph yazıb.
Ukrayna ötən həftə Baltik dənizi bölgəsində yerləşən Rusiya neft qovşaqlarına hücumları gücləndirib. Hədəflər arasında ildə təxminən 18 milyon ton mazut ötürən Ust-Luqa terminalı və mühüm limanlardan biri olan Primorsk da var.
Məlumata görə, Ust-Luqa əvvəlki zərbələrdən sonra hələ də bağlıdır. Bu isə Rusiyanın ən iri neft emalı zavodlarından bəzilərinin fəaliyyətini təhlükə altına salır. Reuters-in məlumatına əsasən, Kirishi, Yaroslavl, Moskva və Ryazan zavodları xam neft tədarükünü azaltmağa məcbur qala bilər.
Enerji analitiki Boris Aronşteyn bildirib ki, bu, müharibənin başlanmasından bəri Rusiya neft və neft məhsulları ixracı üçün ən ciddi təhlükədir. Onun sözlərinə görə, hücumların miqyası, dəqiqliyi və vaxt seçimi son dörd ildə bənzəri görünməyən effekt yaradıb.
Enerji və Təmiz Hava Araşdırmaları Mərkəzinin (CREA) analitiki İsaak Levi isə qeyd edib ki, Ukrayna zərbələrinin təsiri onların ardıcıl şəkildə təkrarlanması ilə bağlıdır. Onun sözlərinə görə, Rusiya zədələnmiş neft emalı obyektlərini bərpa etməyə çalışdığı vaxt Ukrayna pilotsuz aparatlarla təkrar hücumlar təşkil edərək bu prosesi qəsdən ləngidir.
Məqalədə deyilir ki, hücumların tempi azalmaq əvəzinə artır. Şənbə gecəsi Ukrayna Rusiyanın ən iri neft emalı zavodlarından biri olan Yaroslavldakı “Slavneft-YaNOS” müəssisəsinə zərbə endirib.
Bundan başqa, Ukraynanın yerli istehsalı olan “Flamingo” raketindən Samara vilayətində yerləşən partlayıcı maddələr zavoduna hücumda istifadə olunduğu bildirilir. Ukrayna tərəfi iddia edir ki, həmin müəssisədə hər il 30 min tondan çox hərbi təyinatlı partlayıcı istehsal olunur.
Xatırladaq ki, bir neçə gün əvvəl Rusiyanın ən böyük neft emalı zavodlarından biri olan “Kirishinefteorgsintez”in Ukrayna dronlarının hücumundan sonra fəaliyyətini dayandırdığı barədə məlumat yayılmışdı. Reuters həmçinin yazmışdı ki, Ukrayna dron hücumları, “Drujba” boru kəmərindəki problemlər və tanker gecikmələri nəticəsində Rusiya neft ixrac gücünün azı 40 faizini itirib.
Bizim.Media
