Əgər dünya bazarında xam neftin bir barelinin qiyməti 120 ABŞ dollarına çatarsa, Cənubi Koreyada dövlət avtomobillərinin istifadəsinə tətbiq olunan məhdudiyyət özəl sektora da şamil ediləcək.
AZƏRTAC xəbər verir ki, bunu Cənubi Koreyanın maliyyə naziri Koo Yun Çol Yaxın Şərqdəki gərginliyin ölkəsində yanacaq təchizatına yaratdığı çətinliklərə cavab olaraq hökumətin görəcəyi tədbirlərdən danışarkən deyib.
"Əgər vəziyyət pisləşərsə, milli resurs böhranı xəbərdarlığını 3-cü səviyyəyə qaldırmalı ola bilərik. Bu halda nəqliyyat vasitələrinin rotasiya sistemini özəl sektora da şamil edə bilərik”, - deyə nazir KBS televiziyasına müsahibədə bildirib. Koo Yun Çol qeyd edib ki, neft qiymətlərinin 120-130 dollara qədər yüksəlişi milli resurs böhranı xəbərdarlığının səviyyəsini bir pillə qaldırmağa səbəb ola bilər.
Qeyd edək ki, Cənubi Koreyada enerjiyə qənaət məqsədilə martın 25-dən dövlət qurumlarının avtomobilləri üçün məcburi beşgünlük rotasiya sisteminin tətbiqinə başlanılıb. Bu sistemə əsasən avtomobillər dövlət nömrə nişanlarının son rəqəminə görə 5 qrupa bölünür və hər qrup üzrə avtomobillərin müəyyən edilmiş iş günündə istifadəsi qadağan edilir. Rotasiya sisteminə əməl etməyən dövlət qurumlarına qarşı cəzalar tətbiq olunur. Elektromobilllər və hidrogenli nəqliyyat vasitələri bu cür məhdudiyyətlərdən azaddır. İqlim, Enerji və Ətraf Mühit Nazirliyinin hesablamalarına görə, rotasiya sistemi təxminən 1,5 milyon nəqliyyat vasitəsini əhatə edir və hər gün orta hesabla 3 min barel xam neftə qənaət etməyə imkan verir.
Cənubi Koreyanın gündəlik xam neft istehlakı təxminən 2,8 milyon barel təşkil edir ki, bunun da təxminən yarısı nəqliyyat üçün istifadə olunur. Cənubi Koreya sonuncu dəfə Körfəz müharibəsinin yaratdığı neft təchizatı böhranına cavab olaraq 1991-ci ildə özəl sektor üçün nəqliyyat vasitələrinin məcburi rotasiya sistemini tətbiq edib.
