ABŞ Prezidenti Donald Tramp Latın Amerikasındakı geosiyasi vəziyyətlə bağlı növbəti sərt bəyanatını verərək, Kubanın qısa müddət ərzində böyük bir çöküşlə üzləşəcəyini elan edib.
Musavat.com xəbər verir ki, Tramp Kubanı "uğursuz dövlət" və "xaos mənbəyi" adlandıraraq, adada mövcud olan siyasi və iqtisadi sistemin artıq sona çatdığını bildirib. Ağ Ev rəhbəri qeyd edib ki, Kuba rəhbərliyi ölkəni idarə edə bilmir və xalqın rifahını təmin etməkdə acizdir, bu isə yaxın vaxtlarda dövlət strukturunun tamamilə dağılmasına gətirib çıxaracaq. Trampın sözlərinə görə, Kuba bu silsilə çöküşlərin növbəti halqası olacaq və ABŞ bu prosesi yaxından izləyir. Prezident həmçinin vurğulayıb ki, rejim çökdükdən sonra ABŞ Kubaya yenidən qurulması və demokratikləşməsi üçün lazımi köməyi göstərməyə hazırdır.
Bildirilir ki, Trampın bu çıxışını Vaşinqtonun Karib hövzəsindəki təsirini artırmaq və kommunist rejimlərə qarşı daha sərt siyasət yürütmək niyyətinin göstəricisi kimi qiymətləndirirlər. Bu bəyanatın xüsusilə Venesuela və digər region ölkələrində baş verən hadisələrin fonunda səslənməsi, Ağ Evin Latın Amerikası üçün yeni bir "Yol xəritəsi" hazırladığından xəbər verir. Hazırda Havananın bu bəyanata rəsmi reaksiyası gözlənilir, lakin ekspertlər bu çıxışın adadakı daxili müxalifəti və mühacirətdəki kubalıları daha da aktivləşdirəcəyini ehtimal edirlər.
Musavat.com
