Rusiyada işçi qüvvəsinin qocalması getdikcə daha çox nəzərə çarpır. Əmək naziri Anton Kotyakovun sözlərinə görə, bəzi sektorlarda 50 yaşdan yuxarı işçilərin payı 35 faizə çatıb. Ölkədə orta əmək yaşı 42,5-dir. Bu tendensiya davam edərsə, yaxın gələcəkdə işçi qüvvəsinin əksəriyyətini 50 yaşdan yuxarı insanlar təşkil edəcək.
Hafta.az yazır ki, problem xüsusilə fiziki cəhətdən çətin olan sənaye, kənd təsərrüfatı və istehsal sektorlarında hiss olunur. Gənc kadrların çatışmazlığı təhsil və səhiyyə sahələrində də nəzərə çarpır. 2025-ci ilə qədər işçi qüvvəsinin çatışmazlığının 800 mini keçəcəyi proqnozlaşdırılır.
Mütəxəssislər hesab edirlər ki, həll yolları məhduddur. Təqaüd yaşının artırılması və ya yaşlı işçilərin sistemdə qalmasına təşviq edilməsi gündəmdədir. Rəsmi artım olmasa belə, 65 yaşdan yuxarı məşğulluğu genişləndirmək üçün maliyyə stimullarından istifadə edilə bilər.
İqtisadçı Aleksey Zubets qeyd edir ki, qocalma qaçılmazdır, lakin işlər getdikcə zehni cəhətdən çətinləşdiyindən yaşlı işçilər məhsuldar qala bilərlər. Buna baxmayaraq, problem istehsal sektorunda davam edir.
Mütəxəssislər həllin avtomatlaşdırma, məhsuldarlığın artırılması və sağlam həyat tərzi siyasətində olduğunu vurğulayırlar. Növbəti 7 ildə iqtisadiyyata təxminən 12 milyon yeni işçinin əlavə edilməsinin lazım olduğu bildirilir.
Rusiyada 2018-ci ildə başlayan islahat çərçivəsində pensiya yaşı tədricən artırılmağa davam edir.
2026-cı ilə qədər pensiya yaşı kişilər üçün 63, qadınlar üçün 58-ə qaldırılacaq, son hədəf isə kişilər üçün 65, qadınlar üçün isə 60 olacaq. İllik bir neçə aylıq artımları əhatə edən sistem bəzi peşə qrupları üçün erkən təqaüdə çıxma ehtimalını qoruyur.
