Misir prezidenti: Enerji bazarında kəskin bahalaşma riski realdır...
Poliqon xəbər verir ki, Misir prezidenti Əbdül Fəttah əs-Sisi Yaxın Şərqdə hərbi qarşıdurmanın davam edəcəyi təqdirdə neftin qiymətinin bir barel üçün 200 ABŞ dollarına qədər yüksələ biləcəyini bildirib.
Onun sözlərinə görə, bu cür qiymət proqnozları şişirdilmiş hesab olunmamalıdır və mövcud geosiyasi vəziyyət belə ssenarini mümkün edir. Əs-Sisi qeyd edib ki, regionda davam edən gərginlik qlobal enerji bazarına ciddi təsir göstərir və təchizat zəncirlərində riskləri artırır.
Misir prezidenti ABŞ prezidenti Donald Trampa da müraciət edərək bildirib ki, Yaxın Şərqdə, xüsusilə Fars körfəzi regionunda müharibəni dayandırmaq imkanına malik əsas güc məhz Vaşinqtondur. Onun fikrincə, ABŞ-nin aktiv rolu olmadan regionda sabitliyin bərpası çətin görünür.
Analitiklər hesab edirlər ki, belə bir qiymət sıçrayışı qlobal iqtisadiyyata ciddi zərbə vura bilər. Enerji xərclərinin artması inflyasiyanın yüksəlməsinə, istehsal və nəqliyyat xərclərinin bahalaşmasına səbəb olacaq. Bu isə xüsusilə enerji idxalından asılı olan ölkələr üçün əlavə maliyyə yükü yarada bilər.
Ekspertlər əlavə edirlər ki, neft bazarındakı qeyri-sabitlik investorların davranışına da təsir edir və risklərin artması fonunda maliyyə bazarlarında dalğalanmalar güclənə bilər. Buna görə də regionda gərginliyin azaldılması qlobal iqtisadi sabitlik baxımından kritik əhəmiyyət daşıyır.
Poliqon.info
