Son illər daşınmaz əmlak elanlarında xüsusilə Bakı və ətraf kəndlərdə satışa çıxarılan həyət evləri ilə bağlı “kupça yoxdur, lakin 2005-ci il bələdiyyə sənədidir, özəlləşməyə gedir” kimi məlumatlar yer alır və bu, satıcılar tərəfindən müəyyən üstünlük kimi təqdim edilir. Hətta bəzi elanlarda sənədin məhz hansısa ilə aid olması xüsusi vurğulanır. Bu kimi ifadələr isə alıcılar arasında anlaşılmazlıqlar yaradır.
Mövzu ilə bağlı Pravda.az-a açıqlama verən əmlak məsələləri üzrə ekspert Anar Nəsirovun sözlərinə görə, bu, 2007-ci ildən sonra verilən bələdiyyə sənədlərinin qüvvəsini itirmiş olduğunun göstəricisidir.
O bildirib ki, müvafiq sərəncamla 2007-ci ildən sonra bələdiyyələr torpağı yalnız hərrac yolu ilə, çıxarışla sata bilərlər: “Bu, o deməkdir ki, bələdiyyə həmin torpaq sahəsini hərraca çıxararaq vətəndaşa satır və satış zamanı torpaq sahəsi çıxarışla təmin edilir. Çıxarışı olmayan torpaq sahəsini bələdiyyə hərraca çıxara bilməz. 2007-ci ildən əvvəl verilmiş bələdiyyə sənədləri isə bu kateqoriyaya aid olmadığından müəyyən mənada üstün sayılır. Belə ki, 2007-ci ildən sonra verilən bələdiyyə sənədləri özəlləşdirmə prosesinə daxil edilmir və qeyri-qanuni hesab oluna bilər. Amma 2005, 2006, 2007-ci ildə verilən torpaqları özəlləşdirmək mümkündür. Bunun da riskləri mövcuddur. Bələdiyyə bu torpaq sahəsini fərdi yaşayış evinin tikintisi üçün, yaşayış məntəqəsi torpağı kimi satışa çıxarsa da, bir çox hallarda həmin ərazilərlə bağlı fərqli vəziyyət ortaya çıxır. Belə ki, bələdiyyə tərəfindən yaşayış məntəqəsinin torpağı kimi təqdim edilən sahələr daşınmaz əmlakın kadastr uçotunda hər hansı idarənin, təşkilatın və ya dövlət mülkiyyətində olan torpaq sahələri kimi qeydiyyatda ola bilər. Bu zaman vətəndaşın çıxarış almasına birmənalı olaraq imtina verilir. Həmin dövrdə bələdiyyələrin sərəncamındakı torpaq sahələrinin dəqiq xəritələri olmadığından, bəzi hallarda onlara aid olmayan torpaqlar da vətəndaşlara satılıb. Halbuki həmin torpaqlar, ya neft şirkətlərinə, ya dövlətə, ya da hər hansı müəssisəyə məxsus olub. Lakin bələdiyyə bu sahələri öz torpağı hesab edərək vətəndaşlara ayırıb. Nəticədə torpağı alan şəxs çıxarış almaq üçün müraciət etdikdə məlum olur ki, həmin sahə bələdiyyə mülkiyyətində deyil. Bu səbəbdən də çıxarışın verilməsindən imtina edilir.
A.Nəsirovun sözlərinə görə, elanlarda qeyd edilən illərin fərqi budur ki, 2007-ci ildən sonra bələdiyyə torpağı yalnız çıxarış vermək şərti ilə sata bilər “2005-ci ildə vətəndaş torpaq alıbsa, bu, hansısa müəssisə və ya idarənin balansında deyilsə, bələdiyyə torpağı hesab edilərsə, bu zaman vətəndaşa çıxarış vermə hüququ əldə edilir. Fərq bundadır. 2007-ci ildən öncə torpağın ayrılması ilə bağlı bələdiyyənin səlahiyyəti var idi. 2007-ci ildən sonra verilən sənədlər çıxarış almaq üçün heç bir hüquqi zəmin yaratmır. Əvvəlcə torpaq özəlləşdirilir, daha sonra evin layihəsi çəkilib təsdiq edildikdən sonra əmlaka da çıxarış almaq mümkündür”.
Şəhanə Quliyeva
