Uzun müddət yuxuya gedə bilmirsinizsə, yoqa məşqləri bu problemi həll etməyə kömək edə bilər...
Poliqon xəbər verir ki, bu barədə Science Alert nəşrinin yaydığı, 30 randomizə olunmuş nəzarətli tədqiqatın meta-analizinə əsaslanan məlumatda bildirilir.
Araşdırma göstərib ki, yüksək intensivlikli yoqa ilə müntəzəm məşğul olmaq yuxu keyfiyyətini yaxşılaşdırmaq baxımından gəzintidən daha effektivdir.
Çinin Harbin İdman Universitetinin tədqiqatçıları müəyyən ediblər ki, həftədə iki dəfə, hər biri 30 dəqiqədən az davam edən yüksək intensivlikli yoqa məşqləri pis yuxuya qarşı ən təsirli fiziki üsuldur.
Məqalədə qeyd olunur: "Effektivliyinə görə növbəti yerdə gəzinti, daha sonra isə güc məşqləri gəlir. Müsbət nəticələr artıq 8-10 həftə ərzində müşahidə olunub".
Meta-analiz yoqanın niyə yuxu üçün xüsusilə faydalı olduğunu tam izah etməsə də, bir neçə mümkün səbəb göstərilir.
"Yoqa yalnız ürək döyüntüsünü artırmır və əzələləri işlətmir, eyni zamanda tənəffüsü tənzimləyir. Araşdırmalar göstərir ki, nəfəsə nəzarət ‘istirahət və həzm’ funksiyalarına cavabdeh olan parasimpatik sinir sistemini aktivləşdirə bilər", deyə nəşr qeyd edir.
Bundan əlavə, alimlər hesab edirlər ki, yoqa beyin dalğalarının fəaliyyətini tənzimləyərək daha dərin yuxuya kömək edə bilər.
Tədqiqatçılar eyni zamanda nəticələrin şərhində ehtiyatlı olmağa çağırıblar: "Yuxu pozuntularına dair tədqiqatların sayı məhduddur və iştirakçı qrupların xüsusiyyətləri fərqlidir. Bu nəticələrin təsdiqi üçün daha keyfiyyətli araşdırmalara ehtiyac var".
Beləliklə, yoqa məşqləri fiziki aktivliyin yalnız bir növü olsa da, bu nəticələrə əsasən yuxu keyfiyyətini yaxşılaşdırmaq üçün olduqca təsirli üsul hesab olunur.
Tədqiqatın yekununda bildirilir ki, həftədə iki dəfə, 8-10 həftə ərzində, hər seans təxminən 30 dəqiqə davam edən yüksək intensivlikli yoqa proqramı yuxu pozuntusu olan insanlar üçün ən effektiv yanaşmadır.
Poliqon.info
