Bizimyol portalından alınan məlumata görə, ain.az xəbər verir.
“Azərbaycan xalqının tarixində silinməz iz buraxmış faciələrdən biri də 31 Mart soyqırımıdır. Bu qanlı hadisələr təkcə bir dövrün deyil, bütövlükdə xalqımızın yaddaşında dərin yaralar açmış, milli kimliyimizə və dövlətçilik ənənələrimizə qarşı yönəlmiş sistemli məhvetmə siyasətinin bariz nümunəsinə çevrilmişdir. 1918-ci ilin mart-aprel aylarında baş verən bu hadisələr zamanı minlərlə günahsız azərbaycanlı yalnız milli və dini mənsubiyyətinə görə qətlə yetirilib.
31 Mart faciəsi yaddaşlara yalnız tarix kimi deyil, ağrı kimi yazıldı. 1918-ci ilin mart günlərində Bakı və ətraf bölgələrdə insan qanı torpağa qarışdı, küçələr səssiz fəryadlara büründü. Dinc insanlar qəfil hücumların hədəfinə çevrildi, həyat bir anda ölümün kölgəsində qaldı. Qadınların naləsi, uşaqların qorxu dolu baxışları o günlərin ən acı səhnəsinə çevrildi. Şamaxıdan Qubaya, Qarabağdan digər bölgələrə qədər uzanan bu faciə hər yerdə eyni izləri buraxdı. Yandırılan evlər, dağıdılan kəndlər və susdurulan səslər bir xalqın taleyinə yazıldı. Bu hadisələr təkcə insanların deyil, bütöv bir həyatın məhv edilməsi idi. 31 Mart faciəsi bu gün də qəlblərdə yaşayan, unudulmayan bir dərd kimi qalır.
XX əsrin əvvəllərində Cənubi Qafqazda baş verən mürəkkəb geosiyasi proseslər, xüsusilə Rusiya imperiyasının süqutu bölgədə hakimiyyət boşluğu yaratmışdı. Bu vəziyyətdən istifadə edən erməni millətçi silahlı dəstələri və bolşevik qüvvələri Azərbaycan əhalisinə qarşı genişmiqyaslı qırğınlar törətmişdir. Hadisələrin mərkəzində Bakı olmaqla yanaşı, Şamaxı, Quba, Qarabağ, Zəngəzur və digər bölgələr də soyqırımı siyasətinin hədəfinə çevrilib”.
Bu barədə Bizimyol.info xəbər portalına politoloq Nicat İsmayılov danışıb. Politoloq qeyd edib ki, bu qırğınların əsas məqsədi azərbaycanlıları öz tarixi torpaqlarından sıxışdırıb çıxarmaq, bölgədə etnik tərkibi dəyişdirmək və gələcəkdə “Böyük Ermənistan” ideyasının reallaşdırılması üçün zəmin yaratmaq idi.
Nicat İsmayılov
“1918-ci ilin mart günlərində Bakı şəhərində və ətraf ərazilərdə minlərlə insan xüsusi qəddarlıqla öldürülmüş, yaşayış məntəqələri dağıdılmış, tarixi və dini abidələr məhv edilmişdi. Şamaxıda yüzlərlə kənd yerlə-yeksan edilmiş, Qubada isə kütləvi məzarlıqlar yaranmışdır ki, bu da soyqırımının real miqyasını sübut edən faktlardan biridir. Qadınlar, uşaqlar və yaşlılar belə amansızcasına qətlə yetirilmiş, insanların diri-diri yandırılması, işgəncələrə məruz qalması kimi faktlar sənədlərlə təsdiq edilmişdir. Bu hadisələr beynəlxalq humanitar hüququn kobud şəkildə pozulması idi”, – deyə politoloq bildirib.
“Azərbaycan xalqının Ümummilli lideri Heydər Əliyev tərəfindən 1998-ci ildə imzalanmış fərmanla 31 mart tarixi “Azərbaycanlıların Soyqırımı Günü” elan edilmişdir. Bu qərar, hadisələrə ilk dəfə rəsmi siyasi-hüquqi qiymətin verilməsi baxımından mühüm əhəmiyyət daşıyır. Bu gün də Azərbaycan dövləti beynəlxalq ictimaiyyətin diqqətini bu faciəyə yönəltmək, tarixi həqiqətlərin tanıdılması istiqamətində ardıcıl siyasət həyata keçirir. Müxtəlif ölkələrdə keçirilən tədbirlər, konfranslar və nəşrlər vasitəsilə bu qanlı hadisələrin mahiyyəti dünya ictimaiyyətinə çatdırılır.
31 Mart soyqırımı yalnız keçmişin acı xatirəsi deyil, həm də gələcək nəsillər üçün ciddi dərsdir. Bu faciənin unudulmaması, tarixi yaddaşın qorunması milli həmrəyliyin gücləndirilməsi baxımından mühüm rol oynayır. Gənc nəsil bu hadisələr barədə obyektiv və dolğun məlumatlandırılmalı, tariximizin bu qaranlıq səhifələri təhrif olunmadan öyrədilməlidir. Bu, həm də informasiya müharibəsində həqiqətlərin müdafiəsi üçün vacibdir”-deyə Nicat İsmayılov qeyd edib.
Nicat İsmayılov vurğulayıb ki, 31 Mart soyqırımı hadisələri beynəlxalq səviyyədə hələ də tam şəkildə tanınmamışdır, halbuki bu faciə insanlığa qarşı törədilmiş ağır cinayətlərdən biridir: “Dünya ictimaiyyəti bu cür hadisələrə biganə qalmamalı, ədalətin bərqərar olunmasına dəstək verməlidir. Tarixi həqiqətlərin inkarı və ya təhrif edilməsi yeni faciələrə yol aça bilər. Buna görə də beynəlxalq təşkilatlar və dövlətlər bu məsələyə obyektiv yanaşmalı, faktlara əsaslanan mövqe nümayiş etdirməlidirlər”.
“31 Mart soyqırımı Azərbaycan xalqının yaddaşında əbədi qalacaq faciədir. Bu hadisələr təkcə keçmişin deyil, həm də bu günün və gələcəyin məsələsidir.
Tarixi həqiqətlərin qorunması, ədalətin bərpası və belə faciələrin bir daha təkrarlanmaması üçün mübarizə hər birimizin borcudur. Bu qanlı hadisələrin qurbanlarının xatirəsini ehtiramla yad edir, onların ruhu qarşısında baş əyirik. Tarix unudulmur və unutdurulmamalıdır”, – deyə Nicat İsmayılov bildirib.
İradə Cəlil, Bizimyol.info
Azərbaycan Respublikasının Medianın İnkişafı Agentliyi (MEDİA)
Məqalə, Medianın İnkişafı Agentliyinin onlayn media subyektlərinə (veb-saytlara) maliyyə dəstəyi əsasında hazırlanıb.
İstiqamət: 6.3.8. Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği
Daha ətraflı məlumat və yeniliklər üçün ain.az saytını izləyin.
