Dünya futbolunun rəhbəri Canni İnfantino son dövrlərdə yaranan siyasi gərginliklərə və İranın turnirdən çəkilə biləcəyi ilə bağlı yayılan şayiələrə son qoyub.
Offsideplus.az xəbər verir ki, Meksikanın "N+ Univision" kanalına müsahibə verən prezident İranın turnirdə iştirakının FIFA üçün mütləq olduğunu vurğulayıb.
"Yalnız A planı var": İnfantino qeyd edib ki, İran millisi vəsiqəni meydanda qazanıb və onlar dünya çempionatında mütləq iştirak etməlidirlər. "Biz real dünyada yaşayırıq və vəziyyətin çətin olduğunu bilirik, lakin İranın ən yaxşı şəraitdə çıxış etməsi üçün çalışırıq" – deyə o bildirib.
ABŞ ilə danışıqlar: Turnirin ev sahiblərindən biri olan ABŞ ilə İran arasındakı gərginliyə rəğmən, İnfantino Ağ Evdən İran nümayəndə heyətinin ölkəyə girişi və təhlükəsizliyi ilə bağlı təminat aldığını təsdiqləyib.
Matçların yeri dəyişə bilərmi?: İran tərəfi təhlükəsizlik səbəbindən oyunlarının ABŞ-dən Meksikaya keçirilməsini təklif etsə də, FIFA hələlik mövcud proqramı dəyişməyib.
İran millisi Dünya Çempionatının "G" qrupunda mübarizə aparacaq:
- Belçika
- Misir
- Yeni Zelandiya
İranın ilk oyunu 16 iyun 2026-cı ildə Los-Ancelesdəki "SoFi Stadium"da Yeni Zelandiyaya qarşı planlaşdırılıb.
