Bakı, 1 aprel, AZƏRTAC
Yaxın Şərqdən neft tədarükündəki fasilələr aprel ayında artacaq və Avropa iqtisadiyyatına təsir göstərməyə başlayacaq.
AZƏRTAC xəbər verir ki, bu barədə aprelin 1-də Beynəlxalq Enerji Agentliyinin direktoru Fatih Birol bildirib.
“Onun sözlərinə görə, İrana qarşı ABŞ-İsrail müharibəsinin başlamasından bəri Tehranın regiondakı enerji obyektlərinə hücumları və Hörmüz boğazından gəmiçiliyə qoyulan məhdudiyyətlər səbəbindən 12 milyon bareldən çox neft itkisi baş verib”, - deyə “Reuters” yazır.
O, həmçinin bildirib ki, müharibə başlayandan bəri Yaxın Şərqdə təxminən 40 əsas enerji obyekti zədələnib və onların bərpasına müəyyən vaxt lazım olacaq.
“Bizi çox ciddi, tarixdə bu günə qədər baş verən ən böyük böhran gözləyir”, - deyə Birol qeyd edib.
O əlavə edib ki, aprel ayında itkilərin artması gözlənilir, çünki martda gələn bir sıra neft və mayeləşdirilmiş təbii qaz daşınmaları ilə bağlı hələ müharibədən əvvəl müqavilələr bağlanıb və onlar təyinat yerlərinə hərəkət etməkdə davam edib.
“Apreldə neft və mayeləşdirilmiş təbii qaz itkiləri mart ayından iki dəfə çox olacaq... Bu, inflyasiyaya səbəb olacaq və bir çox ölkədə iqtisadi artımı azaldacaq”, - deyə Birol Norveç suveren fondunun rəhbəri Nikolay Tangen ilə birlikdə podkastda bildirib.
Birolun sözlərinə görə, ən böyük problem reaktiv və dizel yanacağı çatışmazlığıdır ki, bu da artıq Asiya ölkələrinə təsir edib, lakin Avropaya da təsir etməsi gözlənilirdi.
“Biz bunu Asiyada müşahidə edirik, amma düşünürəm ki, tezliklə - aprel və ya may aylarında Avropaya çatacaq”, - deyə o əlavə edib.
Birol qeyd edib ki, neft və mayeləşdirilmiş təbii qaz (LNG) tədarükündəki mövcud fasilələr birlikdə 1973 və 1979-cu illərdəki iki neft böhranı və 2022-ci ildə Rusiya-Ukrayna müharibəsinin başlanması səbəbindən Rusiya qaz həcminin itirilməsindən daha pisdir.
