Azərbaycan Respublikası vətəndaşları və şirkətləri üçün qüsurlu mallara görə ödənilmiş gömrük ödənişlərinin qaytarılması prosesi hüquqi çərçivədə dəqiq tənzimlənir.
NOCOMMENT.az-a mövzu ilə bağlı vəkil Esmira Rzayeva bildirib ki, qüsurlu mallara görə ödənilmiş gömrük ödənişləri yalnız mallar istifadə olunmadıqda (yalnız qüsurun müəyyən edilməsi üçün zəruri istifadə istisna olmaqla) və mallar gömrük ərazisindən çıxarıldıqdan sonra qaytarıla bilər.
Ödəyici və ya onun nümayəndəsi, ödənilmiş gömrük ödənişlərinin geri alınması üçün, ödənişin həyata keçirildiyi tarixdən etibarən 1 il müddətində müvafiq gömrük orqanına ərizə ilə müraciət etməlidir. Gömrük orqanı ərizəni qəbul etdikdən sonra 15 gün ərzində qərar qəbul edir və qərar verildikdən sonra 1 ay müddətində vəsait geri qaytarılır.
Əgər qaytarılma 3 ay ərzində baş verməzsə və bu gecikmə gömrük orqanının hərəkətsizliyi ilə əlaqədardırsa, ödəyici əlavə olaraq faizlə də kompensasiya alır. Qaytarılma üçün malların qüsurlu olmasını təsdiq edən sənədlərin təqdim edilməsi zəruridir, lazım gəldikdə isə gömrük orqanı ekspertiza təyin edə bilər.
Esmira Rzayeva əlavə edir ki, qaytarılma prosesi “Gömrük ödənişlərinin qaytarılması Qaydaları”na əsasən həyata keçirilir və alternativ olaraq mallar gömrük ərazisindən çıxarılmadan daxildə emal, tranzit və ya digər xüsusi gömrük prosedurları altında yerləşdirilə bilər.
Bu qaydalar sahibkarlar və fiziki şəxslər üçün gömrük əməliyyatlarında hüquqların qorunmasını təmin edir və qüsurlu mallara görə əlavə xərclərin qarşısını alır.
Aliyə
NOCOMMENT.az
