Birləşmiş Krallıq dünyanın ən vacib gəmiçilik marşrutlarından biri olan, ABŞ və İsrailin İrana qarşı müharibəsi ilə təhdid edilən Hörmüz boğazının açılması üçün genişmiqyaslı beynəlxalq danışıqlara başlayıb.
Bizim.Media xəbər verir ki, bu barədə “Associated Press” məlumat yayıb.
Nəşr qeyd edib ki, aprelin 2-də təxminən otuz ölkə naviqasiya azadlığını bərpa etmək məqsədilə diplomatik və siyasi addımlar barədə razılığa gəlmək üçün virtual görüş keçirəcək.
Böyük Britaniyanın Baş naziri Kir Starmer bildirib ki, iştirakçılar gəmilərin təhlükəsizliyini təmin etmək və vacib məhsulların hərəkətini bərpa etmək üçün "bütün mümkün tədbirləri" müzakirə edəcəklər.
Qeyd edək ki, qlobal neft marşrutu zərbə altındadır. İranın kommersiya gəmilərinə hücumları səbəbindən Hörmüz boğazından keçən nəqliyyat demək olar ki, tamamilə dayanıb.
Bu, Fars körfəzindən neft tədarükü üçün əsas kanalı bağlayıb və qlobal qiymətlərin kəskin artmasına səbəb olub.
Fransa, Almaniya, İtaliya, Kanada, Yaponiya və Birləşmiş Ərəb Əmirlikləri də daxil olmaqla otuz beş ölkə boğazın blokadasına son qoyulmasını tələb edən birgə bəyanata qoşulub.
Bizim.Media
