Aprel döyüşləri Azərbaycan tarixində son illərin ən mühüm hərbi-siyasi hadisələrindən biri kimi yadda qalıb. 2016-cı ilin aprel ayında cəbhə xəttində baş verən bu toqquşmalar uzun illər davam edən status-kvonun dəyişməsində mühüm rol oynadı və Azərbaycan Ordusunun gücünü, peşəkarlığını bir daha nümayiş etdirdi. Qısa müddət ərzində aparılan uğurlu əməliyyatlar nəticəsində strateji yüksəkliklər və bir sıra yaşayış məntəqələri işğaldan azad olundu.
Bu döyüşlər təkcə hərbi uğur deyil, həm də xalqın milli ruhunun, vətənpərvərlik hissinin gücləndiyi bir mərhələ kimi qiymətləndirilir. Azərbaycan əsgəri böyük şücaət göstərərək ölkənin ərazi bütövlüyü uğrunda canından keçdi, şəhidlərimiz qəhrəmanlıq salnaməsi yazdı. Aprel döyüşləri həmçinin sonrakı illərdə baş verən daha genişmiqyaslı hərbi əməliyyatlar üçün mühüm zəmin yaratdı və ordunun döyüş qabiliyyətinin real şəraitdə sınaqdan keçirilməsi baxımından əhəmiyyətli oldu.
Hadisələr bir daha göstərdi ki, Azərbaycan xalqı öz torpaqlarının müdafiəsi və azadlığı uğrunda daim həmrəy və qətiyyətlidir. Bu döyüşlər həm də cəmiyyətin müxtəlif təbəqələrində birlik və milli həmrəylik hissini daha da gücləndirdi.
Bəs görəsən Aprel döyüşləri ilə bağlı şəhər sakinləri nə düşünür, bu hadisələri necə xatırlayır və onun ölkənin gələcəyi baxımından əhəmiyyətini necə qiymətləndirirlər?
SİA şəhər sakinləri arasında sorğu keçirib.
Şəhər sakini Eldar Qasımov: “Biz yaşlı nəsil üçün 2016-cı ilin aprel ayı həm həyəcanlı, həm də kədərli anlarla yadda qalıb. O döyüşlər göstərdi ki, Azərbaycan Ordusu həqiqətən güclüdür, vətənimizin müdafiəsi üçün hazırdır. Çox sevinirik ki, bu gün artıq azad ölkənin azad vətəndaşlarıyıq. Allah Vətən yolunda canından keçən şəhidlərimizə rəhmət eləsin, qazilərimizə isə can sağlığı versin. Bizim nəsil üçün bu qələbə həm də uzun illər boyu yaşadığımız torpaq həsrətinə son qoyan bir ümid işığı oldu”.
Şəhər sakini Azər Əliyev: “Aprel döyüşləri bizim üçün təkcə hərbi əməliyyat deyildi, həm də xalqımızın ruhunu sınağa çəkən bir dönəm idi. Uzun illər torpaqlarımızın işğal altında qalmasına dözmüş nəsil kimi, o anlarda hər birimiz qəlbimizdə bir ümid işığı hiss etdik. Bu döyüşlər göstərdi ki, Azərbaycan xalqı birləşdikdə heç bir düşmən gücü qarşısında dayana bilməz. Biz indi qürur hissi ilə deyə bilərik ki, ordumuz güclü, dövlətimiz isə birliyini qorumağa qadirdir”.
Şəhər sakini Səid Mehdiyev: “Mən Birinci Qarabağ müharibəsinin veteranıyam və 2016-cı ilin aprel ayının 1-dən 2-nə keçən gecəni heç vaxt unutmaram. Ordumuzun qəhrəmanlığı nəticəsində torpaqlarımızın bir hissəsi düşmən tapdağından azad edildi. Bu, sadəcə taktiki uğur deyildi, həm də xalqımız üçün böyük mənəvi qələbə idi. Daha sonra 2020-ci ildə baş verən 44 günlük Vətən müharibəsi ilə torpaqlarımız tam azad edildi və biz gördük ki, əsgərlərimizin fədakarlığı və xalqın birliyi real nəticələr verə bilər”.
Şəhər sakini Elməddin Bəxtiyarov: “Azərbaycan tarixində Aprel döyüşlərinin rolu danılmazdır. Hərbi əməliyyatların uğuru ordumuzun gücünü nümayiş etdirdi və eyni zamanda xalqın milli ruhunu gücləndirdi. Biz yaşlı nəsil üçün bu döyüşlər, mərd oğullarımızın göstərdiyi şücaət və qəhrəmanlıq Azərbaycan xalqının başının uca qalmasının bir nişanəsi oldu. Bu hadisələr göstərdi ki, torpaqlarımızın müdafiəsi üçün birliyimizi qorumaq həyati əhəmiyyət daşıyır”.
Şəhər sakini Zəfər Ağayev: “Biz illər boyunca müxtəlif sınaqlardan keçmişik və Aprel döyüşləri həmin dövrün ən önəmli hadisələrindən biridir. O döyüşlər göstərdi ki, artıq Azərbaycan güclü ordusu, güclü dövlət strukturları və vətənpərvər vətəndaşları ilə öz torpaqlarını qorumağa qadirdir. Bu həm qürur mənbəyidir, həm də gələcək nəsillərə öyrədilməsi lazım olan bir dərsdir. Biz gənc nəslin də bu tarixi düzgün dərk etməsini vacib sayırıq.”
.jpg)
Şəhər sakini Cəmil İsmayılov: “Aprel döyüşləri bizim üçün həm tarixi, həm də mənəvi əhəmiyyət daşıyır. Biz müharibənin nə demək olduğunu bilirik, bir çoxumuz yaxınlarımızı torpaqlar uğrunda itirmişik. Bu döyüşlər göstərdi ki, xalqımız birləşdikdə böyük güc əldə edir. Gələcək nəsil üçün əsas məsələ bu qələbələrin qiymətini bilmək, şəhidlərimizin və qazilərimizin haqqını tanımaq və onların xatirəsini yaşatmaqdır”.
Şəhər sakini Hacı Şıxəliyev: “2016-cı ilin aprel hadisələri mənim yaddaşımda dərin iz buraxıb. Uzun illərdən sonra ilk dəfə idi ki, torpaqların geri alınması real görünürdü. Bu, həm hərbi, həm də mənəvi qələbə idi. Allah bütün şəhidlərimizə rəhmət eləsin, qazilərimizə isə can sağlığı versin. Bizim nəsil üçün Aprel döyüşləri bir öyüd, gələcək nəsillər üçün isə əbədi bir xatirədir”.
.jpg)
Şəhər sakini Sabir Muradov: “Mən yaşım etibarilə bu döyüşlərin şahidi olmuş bir insanam. Hər dəfə Aprel hadisələrini xatırlayanda qürur hissi ilə yanaşı, dərin hüzün də keçirirəm. Ordumuzun göstərdiyi şücaət və xalqın həmrəyliyi göstərdi ki, Azərbaycan öz torpaqlarını qorumaqda əzmkar və qətiyyətlidir. Biz bu qələbəni sadəcə hərbi uğur kimi deyil, həm də milli birliyin, vətənpərvərliyin göstəricisi kimi dəyərləndiririk”.
