İqtisadi İslahatların Təhlili və Kommunikasiya Mərkəzi (İİTKM) və Türkiyə Respublikasının Prezident Administrasiyasının İnvestisiya və Maliyyə Ofisinin (Invest in Türkiye) birgə təşkilatçılığı ilə “Azərbaycan Müştərək Kapital Bazarları Proqramı” çərçivəsində Türkiyənin nüfuzlu iş adamlarından ibarət heyət ölkəmizə səfər edib.
XQ xəbər verir ki, proqramın açılışında İqtisadi İslahatların Təhlili və Kommunikasiya Mərkəzinin icraçı direktoru, professor Vüsal Qasımlı çıxış edərək Azərbaycanla Türkiyə arasındakı iqtisadi əlaqələrin inkişafından danışıb. O bildirib ki, bu səfər 2021-ci ilin 15 iyun tarixində Şuşa şəhərində Azərbaycan Respublikasının Prezidenti İlham Əliyevin və Türkiyə Respublikasının Prezidenti Rəcəb Tayyib Ərdoğanın imzaladığı “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”ndə vurğulanan investisiya əməkdaşlığının qarşılıqlı faydalı inkişafı üçün daha əlverişli şəraitin genişləndirilməsi istiqamətində səylərin artırılması məqsədinə xidmət edir. Türkiyənin nüfuzlu şirkətlərinin təmsil olunduğu səfər ölkələrimiz arasında iqtisadi əlaqələrin dərinləşməsinə, birbaşa xarici investisiyaların cəlbinə töhfə verə bilər.
Sonra Türkiyə Prezident Administrasiyasının İnvestisiya və Maliyyə İdarəsinin Maliyyə Departamentinin rəhbəri Tarık Akın çıxış edərək qarşılıqlı maraq doğuran məsələlərdən danışıb.
İki gün davam edəcək səfər zamanı qardaş ölkədən gələn nümayəndə heyətinin Mərkəzi Bank, Maliyyə Nazirliyi, Rəqəmsal İnkişaf və Nəqliyyat Nazirliyi, Azərbaycan Dövlət Neft Fondu, SOCAR, Kiçik və Orta Biznesin İnkişafı Agentliyi, “PASHA Holding”, Milli Depozit Mərkəzi, Bakı Fond Birjası, “Azer-Türk Bank”, Azərbaycan Beynəlxal Bankı, “Azərbaycan Fintex Assosiasiyası”, Azərbaycan Banklar Assosiasiyası və digər qurumlarda görüşləri nəzərdə tutulub.
Səfərdə "Golden Global Yatırım Bankası A.Ş.", "Kuveyt Türk Portföy Yönetimi A.Ş.", "Dünya Katılım (DK) Varlık Kiralama A.Ş. ", "Arz Gayrimenkul ve Girişim Sermayesi Portföy Yönetimi A.Ş.", "Katılım Emeklilik Hayat A.Ş.", "Türkiye Katılım Sigorta A.Ş.", "Fon Angels Girişim Kitle Fonlama A.Ş.", "Fongogo Kitle Fonlama Platformu A.Ş.", "İnnova Bilişim Çözümleri A.Ş.", "İnsha Ventures Teknoloji Geliştirme ve Pazarlama A.Ş.", "Mehr Bilişim Teknolojileri A. Ş.", "PayPorter Ödeme Hizmetleri ve Elektronik Para A.Ş." və "TriO Blockchain Labs" şirkətlərinin rəhbər şəxsləri iştirak edirlər.
