Varlı Çin vətəndaşları Zimbabvenin paytaxtı Hararedə elit daşınmaz əmlak almağa aktiv şəkildə başlayıblar və şəhəri öz kapitalları üçün yeni “cazibə mərkəzinə” çevirirlər. Bu barədə Bloomberg agentliyi məlumat yayıb.
Qiyməti 500 min dollardan 2 milyon dollara qədər olan daşınmaz əmlaka tələbat Highland və Borrowdale Brook kimi prestijli rayonlarda o qədər artıb ki, agentliklər Çin dilini bilən əməkdaşlar işə götürür, alqı-satqı isə çox vaxt nağd şəkildə həyata keçirilir. Bu da alıcılara danışıqlarda üstünlük verir.
Digər inkişaf etməkdə olan ölkələrdən fərqli olaraq, burada əsasən kasıb çinli işçilər deyil, mədən sənayesi və digər yüksək gəlirli sahələrlə əlaqəli top-menecerlər və biznesmenlər məskunlaşır.
Çin şirkətləri artıq Zimbabvenin litium sektorunda mühüm mövqelər tutur, energetika, bank və infrastruktur sahələrinə investisiya yatırır. Bununla yanaşı, Hararedə Çin restoranları, ticarət mərkəzləri və kazinolar da açılır.
Agentliyin məlumatına görə, bəzi elit rayon sakinləri yeni sahiblərin tarixi evləri aktiv şəkildə dəyişdirməsindən və tikinti qaydalarına məhəl qoymamasından narazıdır. Bununla belə, bir çox ekspertlər varlı çinlilərin axınını ölkə üçün ümumilikdə müsbət hal kimi qiymətləndirir.
