BAKI, 5 aprel. TELEQRAF
OPEC+ nazirlərinin monitorinq komitəsi enerji daşıyıcılarının fasiləsiz tədarükü üçün beynəlxalq dəniz marşrutlarının qorunmasının mühüm əhəmiyyət daşıdığını bəyan edib.
Teleqraf xəbər verir ki, bu barədə təşkilatın açıqlamasında bildirilib.
Məlumata görə, komitə qlobal enerji bazarındakı vəziyyəti müzakirə edərək əməkdaşlıq bəyannaməsinin bazar sabitliyinin qorunmasında əsas rol oynadığını vurğulayıb.
Açıqlamada qeyd olunub ki, beynəlxalq dəniz yollarının təhlükəsizliyinin təmin edilməsi enerji daşıyıcılarının fasiləsiz tədarükü üçün kritik əhəmiyyət kəsb edir.
Bununla yanaşı, komitə enerji infrastrukturuna edilən hücumlardan narahatlığını ifadə edib. Bildirilib ki, zədələnmiş obyektlərin tam gücü ilə bərpası böyük maliyyə və vaxt tələb edir, bu isə ümumi enerji təchizatına mənfi təsir göstərir.
Komitə vurğulayıb ki, enerji tədarükünün təhlükəsizliyini pozan istənilən addımlar, istər infrastruktur hücumları, istərsə də beynəlxalq marşrutların pozulması bazarda volatilliyi artırır və OPEC+ çərçivəsində sabitliyi qorumaq səylərini zəiflədir.
Eyni zamanda, təşkilat üzv ölkələrin alternativ ixrac marşrutlarından istifadə etməklə tədarükün davamlılığını təmin etməsini yüksək qiymətləndirib.
