Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Elşad Cəfərovun cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim Mikayıl Məmmədzadənin sədrliyi ilə keçirilən prosesdə hökm oxunub.
Məhkəmənin hökmü o, 1 il 9 ay müddətə azadlıqdan məhrum edilib.
İttihama görə, Elşad Cəfərov təxminən 2014-cü ildə Gəncə şəhərində “Univermaq” adlanan ərazidən qanunsuz olaraq əldə etdiyi, soyuq silah hesab edilən ov bıçağını uzun müddət üzərində daşıyıb. O, həmin bıçaqdan silah qismində istifadə edib.
Hadisə 06 iyul 2024-cü il tarixdə, saat 20 radələrində Şəmkir rayonu, Seyfəli kəndi ərazisində yerləşən kafelərdən birində baş verib. Belə ki, təqsirləndirilən şəxs alkoqol sərxoşluğu vəziyyətində tanışları ilə birlikdə zərərçəkmiş V.V.-yə (adı, soyadı şərtidir) məxsus kafeyə gəlib. Elşad kafedə zərərçəkmiş şəxsdən pivə gətirilməsini tələb edib. Lakin kafedə pivənin olmadığı bildirildikdə təqsirləndirilən şəxs və onunla birlikdə olan şəxslər heç bir əsaslı səbəb olmadan yüksək səslə nalayiq ifadələr işlədərək ictimai qaydanı pozmağa başlayıblar.
İstintaqla müəyyən olunub ki, onlar xuliqanlıq hərəkətlərini davam etdirərək V.V.-nin əyləşdiyi masaya yaxınlaşıb, ona məxsus əmlakı qəsdən məhv ediblər. Belə ki, ümumilikdə 18 manat dəyərində 6 ədəd şüşə qab, 15 manat dəyərində 3 ədəd boşqab və 120 manat dəyərində 4 ədəd dəmir stul sındırılıb.
Bundan əlavə, hadisə zamanı ictimai qaydanın pozulmasının qarşısını almağa çalışan Şəmkir rayonunun Könüllü kənd sakini olan zərərçəkmiş B.B.-nin (adı, soyadı şərtidir) ünvanına da nalayiq ifadələr işlədilib, o təhqir olunub. Elşad qanunsuz olaraq əldə edib üzərində gəzdirdiyi ov bıçağını cibindən çıxararaq nümayiş etdirməklə ətrafdakı şəxslərə müqavimət göstərib.
İş materiallarına görə, hadisə insanların sıx toplaşdığı ictimai məkanda baş verib və təxminən 20-25 dəqiqə davam edib. Bu müddət ərzində kafenin normal fəaliyyəti pozulub, ətrafda olan şəxslər arasında narahatlıq və həyəcan yaranıb.
Daha sonra tərəflər arasında yaranmış qarşıdurma zamanı zərərçəkmiş B.B. təqsirləndirilən şəxsə yumruqla zərbə endirib və nəticədə sonuncu yüngül xəsarətlər alıb. Lakin bundan sonra Elşad üzərində gəzdirdiyi ov bıçağından istifadə edərək B.B.-yə hücum edib. O, zərərçəkmiş şəxsin bel nahiyəsinə bir dəfə bıçaq zərbəsi endirib. Nəticədə B.B.-yə qarın boşluğuna nüfuz edən, dalağın zədələnməsi və kəskin qanitirmə ilə müşayiət olunan deşilmiş-kəsilmiş yara yetirilib.
Məhkəmə-tibbi ekspertizasının rəyinə əsasən, həmin xəsarət həyat üçün təhlükəli olmaqla sağlamlığa ağır zərər vurma kimi qiymətləndirilib.
Kamal Məmmədov
