Tbilisi, 6 aprel, AZƏRTAC
Gürcüstan parlamenti “Qrantlar haqqında” qanuna növbəti dəfə düzəlişlər etməyi nəzərdə tutur.
AZƏRTAC xəbər verir ki, parlamentə təqdim olunan qanun layihəsinə əsasən, Gürcüstanda akkreditə olunmuş diplomatik nümayəndəliklər, konsulluqlar və beynəlxalq təşkilatlar tərəfindən ayrılan vəsaitlər qrant hesab edilməyəcək.
Layihədə deyilir: "Gürcüstanda akkreditə olunmuş diplomatik nümayəndəliklər, konsulluqlar və beynəlxalq təşkilatların nümayəndəlikləri tərəfindən verilən, xarici ölkə hökumətinin və ya xarici siyasi partiyanın siyasi və ya ictimai maraqlarından, yanaşmalarından və ya münasibətlərindən irəli gələn və diplomatik nümayəndəliyin öz fəaliyyəti ilə birbaşa əlaqəli olan fəaliyyətlər üçün istifadə edilən və ya istifadə edilə bilən vəsaitlərin qrant kimi qəbul edilməməsi məsləhətdir”.
Qanun layihəsinə verilən izahlı qeyddə deyilir: "Qanunun hazırkı ifadəsi yuxarıda qeyd olunan münasibətə şamil edilmir, lakin qanunun vahid oxunuşunu təmin etmək üçün onu müvafiq şəkildə aydınlaşdırmaq məqsədəuyğundur".
