Yağışlı hava şəraitində yol xətlərinin görünməməsi sürücülər üçün həm təhlükə, həm də yol nişanları ilə bağlı anlaşmazlıqlar yaradır. Yağıntılı havalarda bəzi yollarda nişan xətlərinin, ümumiyyətlə, olmaması və ya standartlara uyğun çəkilməməsi vəziyyəti daha da çətinləşdirir. Belə hallarda sürücünün qaydanı pozub-pozmadığı və cərimə məsələsi sual doğurur.
Mövzu ilə bağlı Pravda.az-a açıqlama verən nəqliyyat məsələləri üzrə ekspert Samuran Səmədbəylinin sözlərinə görə, yağışlı hava şəraitində yol örtüyünün su ilə örtülməsi nəticəsində üfüqi nişanlanma xətlərinin vizual qavranılması əhəmiyyətli dərəcədə çətinləşir, bəzi hallarda isə tamamilə mümkünsüz olur.
O bildirib ki, bu, sürücünün hərəkət trayektoriyasını düzgün müəyyən etməsinə birbaşa təsir göstərir: “Normativ tələblərə əsasən, yol nişanlarına və nişanlanma xətlərinə riayət olunması sürücünün vəzifəsidir və bu qaydaların pozulması inzibati məsuliyyət yaradır. Lakin burada əsas məsələ nişanlanmanın faktiki görünüş səviyyəsidir. Əgər mövcud hava şəraiti səbəbindən yol nişanlanması vizual olaraq seçilmirsə, bu halda hüquqi qiymətləndirmə mübahisəli xarakter daşıyır. Çünki sürücüdən yalnız qavranıla bilən və aydın şəkildə görünən yol elementlərinə uyğun davranış gözlənilə bilər. Eyni zamanda, avtomatik nəzarət sistemləri bu cür hallarda yolun real vəziyyətini və meteoroloji amilləri nəzərə almadan yalnız texniki pozuntu faktını qeydə alır ki, bu da bəzi hallarda obyektivlik prinsipinin pozulmasına səbəb ola bilər. Bu səbəbdən, belə hallarda tətbiq olunan inzibati tənbehlərin hüquqi əsaslılığı konkret şəraitin, xüsusilə də yolun görünüş vəziyyətinin qiymətləndirilməsindən birbaşa asılıdır və sürücü şikayət edərək, həmin protokolun ləğv olunmasını tələb edə bilər”.
Şəhanə Quliyeva
