Azərbaycanda səhiyyə sahəsində mühüm qərarlardan biri qəbul olunub. “Tibbi Ərazi Bölmələrini İdarəetmə Birliyi” (TƏBİB) publik hüquqi şəxsin Müşahidə Şurasının yeni tərkibi təsdiqlənib. Bununla bağlı Prezident İlham Əliyev müvafiq Sərəncam imzalayıb.
Sərəncama əsasən, Müşahidə Şurasına rəhbərlik Azərbaycan Prezidentinin sosial-iqtisadi məsələlər üzrə köməkçisinə həvalə olunub. Şuranın üzvləri sırasında isə Maliyyə, Səhiyyə, eləcə də Əmək və Əhalinin Sosial Müdafiəsi nazirliklərinin müavinləri, həmçinin Səhiyyə İşçiləri Həmkarlar İttifaqının sədri yer alıblar.
Qeyd edək ki, daha əvvəl Müşahidə Şurasının sədri vəzifəsini İcbari Tibbi Sığorta üzrə Dövlət Agentliyinin İdarə Heyətinin sədri icra edirdi. Yeni dəyişikliklər idarəetmə strukturunun təkmilləşdirilməsi və səhiyyə sistemində koordinasiyanın daha da gücləndirilməsi məqsədi daşıyır.
Ekspertlər hesab edir ki, bu qərar TƏBİB-in fəaliyyətində çevikliyin artırılmasına, həmçinin dövlət qurumları arasında əməkdaşlığın daha effektiv təşkilinə müsbət təsir göstərəcək.
