Vaşinqtonun nümayəndə heyətinə rəhbərlik edəcək Vens danışıqların əsas şərtlərini açıqlayıb...
Poliqon xəbər verir ki, ABŞ nümayəndə heyətinə rəhbərlik edəcək Vens Pakistanda planlaşdırılan İranla danışıqlarda Vaşinqtonun əsas tələblərini açıqlayıb. O bildirib ki, ABŞ İranın nüvə proqramı ilə bağlı sərt mövqe nümayiş etdirəcək.
Vensin sözlərinə görə, ABŞ prezidenti Donald Trampın mövqeyi aydındır: İranın nüvə silahı əldə etmək imkanına malik olması qətiyyən qəbul olunmur. O qeyd edib ki, Vaşinqton İranın nüvə silahına yönəlik zənginləşdirmə fəaliyyətini də dayandırmasını istəyir.
ABŞ rəsmisi əlavə edib ki, danışıqlar zamanı əsas tələblərdən biri İranın əlində olan nüvə yanacağının ABŞ-yə təhvil verilməsi olacaq. Onun sözlərinə görə, bu addım İranın nüvə proqramının hərbi məqsədlərə yönəlməsinin qarşısını almaq üçün vacib hesab olunur.
Ekspertlər bildirirlər ki, bu cür tələblər danışıqlar prosesini daha da mürəkkəbləşdirə bilər, çünki Tehran əvvəllər də nüvə proqramından imtina etməyəcəyini bəyan edib. Bununla belə, ABŞ tərəfi bu məsələdə kompromisə getmək niyyətində olmadığını açıq şəkildə göstərir.
Analitiklərin fikrincə, qarşıdakı danışıqlar regionda gərginliyin azalması üçün mühüm əhəmiyyət daşısa da, tərəflərin sərt mövqeləri razılaşmanın əldə olunmasını çətinləşdirə bilər.
Poliqon.info
