Səudiyyə Ərəbistanında bəzi enerji obyektlərinə edilən hücumlar səbəbindən əməliyyatların qismən dayandırıldığı, Şərq-Qərb neft kəməri üzərindəki nasos stansiyasının zədələnməsi nəticəsində gündəlik təxminən 700 min barel neft axınında itki yaşandığı bildirilib.
AFN.az xəbər verir ki, Səudiyyə Ərəbistanının rəsmi agentliyi SPA-nın Energetika Nazirliyinə istinadən yaydığı məlumatda ölkənin neft, qaz, neft-kimya və elektrik infrastrukturlarının son dövrlərdə intensiv hücumların hədəfi olduğu qeyd edilib.
Paytaxt Ər-Riyad, Şərq bölgəsi və Yanbu sənaye zonalarını əhatə edən hücumlar nəticəsində Səudiyyə Enerji Şirkətinin (SEC) bir əməkdaşı həyatını itirib, 7 nəfər isə yaralanıb. Nazirlik rəsmisinin bildirdiyinə görə, Şərq-Qərb kəmərindəki strateji nasos stansiyasının hədəf alınması qlobal bazarlara neft tədarükü üçün əsas marşrut sayılan bu xətt üzrə axını əhəmiyyətli dərəcədə azaldıb. Bundan əlavə, Münifə və Hurays istehsal obyektlərinə edilən hücumlar nəticəsində hasilatda ümumilikdə 600 min barellik bir azalma qeydə alınıb.
Hücumların Ras Tanura, SAMREF və Ər-Riyad kimi əsas neft emalı zavodlarını da əhatə etməsi emal olunmuş məhsulların ixracına birbaşa təsir göstərib. Cuayma bölgəsində baş verən yanğınların mayeləşdirilmiş neft qazı (LPG) tədarükündə problemlər yaratdığı vurğulanıb. Səudiyyə rəsmiləri bu vəziyyətin enerji təhlükəsizliyinə ciddi zərbə vurduğunu, neft bazarlarında qeyri-sabitliyi artırdığını və qlobal iqtisadiyyat üçün mənfi fəsadlar doğura biləcəyini xəbərdarlıq ediblər. Tədarük zəncirindəki qırılmaların davam edəcəyi təqdirdə bərpa prosesinin daha da ləngiyəcəyi ehtimal olunur.
