Müasir Azərbaycan dövlətçilik tarixində 11 aprel 2018-ci il prezident seçkiləri xüsusi yer tutur. Bu tarix yalnız növbəti siyasi kampaniya deyil, həm də Azərbaycanın gələcək inkişaf istiqamətlərinin müəyyənləşdirildiyi, dövlət idarəçiliyində davamlılığın və strateji kursun xalq tərəfindən bir daha təsdiq olunduğu mühüm mərhələ kimi xarakterizə olunur. Həmin gün Azərbaycan xalqının böyük əksəriyyətinin dəstəyi ilə İlham Əliyev yenidən Prezident seçilməsi milli iradənin təntənəsi olmaqla yanaşı, ölkədə sabitliyin, inkişafın və güclü dövlət modelinin qorunmasına verilən açıq dəstək idi.
Seçkilərdən sonra Prezident İlham Əliyevin andiçmə mərasimində səsləndirdiyi fikirlər Azərbaycanın gələcək inkişaf fəlsəfəsini aydın şəkildə ortaya qoydu. Dövlət başçısı qeyd edirdi ki, ölkənin qarşısında duran əsas vəzifə əldə olunmuş nailiyyətləri qorumaqla yanaşı, yeni inkişaf mərhələsinə qədəm qoymaqdır. Bu yanaşma, əslində, dövlət siyasətinin uzunmüddətli strateji planlara əsaslandığını və hər bir addımın gələcəyə hesablandığını göstərirdi.
2018-ci ildən sonra Azərbaycanda həyata keçirilən genişmiqyaslı islahatlar ölkənin bütün sahələrini əhatə etdi. İqtisadi sahədə aparılan struktur dəyişiklikləri, qeyri-neft sektorunun inkişafına yönəlmiş proqramlar, sahibkarlığın təşviqi və investisiya mühitinin yaxşılaşdırılması ölkənin iqtisadi dayanıqlığını əhəmiyyətli dərəcədə artırdı. Sosial sahədə maaşların və pensiyaların artırılması, yeni sosial proqramların icrası, əhalinin rifahının yüksəldilməsi istiqamətində atılan addımlar dövlətin sosial yönümlü siyasətinin bariz nümunəsinə çevrildi.
Bütün bu nailiyyətlərin əsasında isə Heydər Əliyev tərəfindən müəyyən edilmiş və müasir dövrün tələblərinə uyğun şəkildə inkişaf etdirilən siyasi kurs dayanır. Ulu Öndərin əsasını qoyduğu dövlətçilik fəlsəfəsi – milli maraqlara əsaslanan müstəqil siyasət, güclü iqtisadiyyat və sosial rifah modeli – bu gün Prezident İlham Əliyev tərəfindən uğurla davam etdirilir. Bu siyasi varislik Azərbaycanın davamlı inkişafının əsas təminatçısı kimi çıxış edir.
11 aprel 2018-ci il seçkilərindən sonra keçən dövrün ən mühüm və tarixi hadisəsi isə, şübhəsiz ki, İkinci Qarabağ müharibəsi oldu. 2020-ci ildə baş vermiş 44 günlük Vətən müharibəsi Azərbaycan xalqının uzun illər gözlədiyi tarixi ədalətin bərpası ilə nəticələndi. Bu müharibə yalnız hərbi qələbə deyil, həm də siyasi iradənin, milli birliyin və güclü liderliyin təntənəsi idi.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu işğal altındakı torpaqları azad edərək ölkənin ərazi bütövlüyünü təmin etdi. Bu Qələbə həm də göstərdi ki, illər boyu aparılan düşünülmüş siyasət, güclü ordu quruculuğu və beynəlxalq arenada mövqelərin möhkəmləndirilməsi öz real nəticəsini verir.
Qələbənin simvoluna çevrilən əsas hadisələrdən biri isə Şuşa şəhərinin azad olunması oldu. Şuşanın azad edilməsi yalnız strateji baxımdan deyil, həm də mənəvi və mədəni baxımdan böyük əhəmiyyət daşıyırdı. Bu hadisə Azərbaycan xalqının milli qürurunun bərpası, tarixi ədalətin təmin olunması və gələcək zəfərlərin müjdəçisi kimi tarixə düşdü.
Qarabağ Zəfərinin məntiqi davamı olaraq 2023-cü ilin sentyabrında həyata keçirilən lokal xarakterli antiterror tədbirləri nəticəsində Azərbaycan öz suverenliyini tam şəkildə bərpa etdi. Bu əməliyyatlar dövlətin qətiyyətini, siyasi iradəsini və milli maraqlarını qorumaq gücünü bir daha nümayiş etdirdi. Beləliklə, Azərbaycan ərazisində separatizmə son qoyuldu, ölkənin konstitusion quruluşu tam təmin edildi.
Postmünaqişə dövründə isə Azərbaycan yeni inkişaf mərhələsinə qədəm qoydu. Azad edilmiş ərazilərdə genişmiqyaslı bərpa və quruculuq işlərinin həyata keçirilməsi, müasir infrastrukturun yaradılması, “ağıllı şəhər” və “ağıllı kənd” layihələrinin tətbiqi ölkənin gələcək inkişafının əsas prioritetlərindən birinə çevrildi. Bu layihələr yalnız iqtisadi inkişaf deyil, həm də sosial rifahın təmin olunması baxımından mühüm əhəmiyyət kəsb edir.
Eyni zamanda, Azərbaycan beynəlxalq münasibətlər sistemində öz mövqelərini daha da möhkəmləndirmiş, regional və qlobal layihələrin əsas iştirakçılarından birinə çevrilmişdir. Enerji təhlükəsizliyi, nəqliyyat-logistika layihələri və beynəlxalq əməkdaşlıq sahəsində əldə olunan uğurlar ölkənin strateji əhəmiyyətini daha da artırmışdır.
Bütün bu reallıqlar fonunda 11 aprel 2018-ci il prezident seçkiləri Azərbaycanın tarixində böyük Zəfərə aparan yolun başlanğıc mərhələsi kimi qiymətləndirilməlidir. Bu tarixdən sonra əldə olunan nailiyyətlər bir daha sübut edir ki, düzgün müəyyən edilmiş siyasi kurs, güclü liderlik və xalqın birliyi dövlətin inkişafının əsas təminatıdır.
Bu gün Azərbaycan xalqı qalib xalq kimi gələcəyə inamla baxır. Dövlətimizin gücü, ordumuzun qüdrəti və xalqımızın birliyi Azərbaycanın qarşısında yeni üfüqlər açır. 11 aprel 2018-ci ildə verilmiş qərarın nəticələri bu gün artıq özünü tam şəkildə göstərir və ölkəmiz daha böyük uğurlara doğru inamla irəliləyir.

Bayram Xudayarov
Elm və Təhsil Nazirliyi Fizika İnstitutunun əməkdaşı,
"Heydər Əliyev məktəbinin davamçıları" Feysbuk qrupunun təsisçisi və rəhbəri,
YAP-ın fəal üzvü

• Strateji
• Tarixi Zəfər
• Inkişaf Mərhələsi