İsrail Baş naziri bu bəyanatı İspaniyanın Qəzzada atəşkəsə nəzarət edən koordinasiya mərkəzindən kənarlaşdırılmasından sonra səsləndirib...
Poliqon xəbər verir ki, bu barədə İsrailin Baş naziri Benyamin Netanyahu videoaçıqlamasında bildirib.
Netanyahunun sözlərinə görə, İsrailə qarşı siyasi mübarizə aparan və onu hədəfə alan dövlətlər bunun nəticələri ilə üzləşəcəklər. O vurğulayıb ki, İsrail dövlətini tənqid edib terrorçu rejimlərə qarşı çıxmayan tərəflər regionun gələcəyi ilə bağlı məsələlərdə Təl-Əviv üçün tərəfdaş sayıla bilməz.
Bu açıqlama İsrailin İspaniyanı Qəzza zolağında atəşkəs rejiminin icrasına nəzarət edən Kiryat-Qatda yerləşən Mülki-Hərbi Koordinasiya Mərkəzindən (CMCC) çıxarmasından sonra səslənib. Rəsmi Təl-Əvivin bu addımı iki ölkə arasında siyasi gərginliyin daha da artdığını göstərir.
Netanyahu çıxışında bildirib ki, İsrailə qarşı yönəlmiş “ikiüzlülük” və “düşmənçilik” ilə barışmaq niyyətində deyil. O qeyd edib ki, heç bir ölkəyə İsrailə qarşı siyasi müharibə aparmağa və bunun əvəzini ödəmədən davam etməyə imkan verilməyəcək.
İsrail Baş nazirinin bu sərt bəyanatı Təl-Əvivin son dövrlərdə bəzi Avropa ölkələri ilə münasibətlərində yaranmış fikir ayrılıqlarının daha açıq mərhələyə keçdiyini göstərir. Xüsusilə Qəzza ilə bağlı mövzularda artan beynəlxalq tənqid fonunda İsrail rəhbərliyi cavab addımlarını daha açıq şəkildə nümayiş etdirməyə başlayıb.
Müşahidəçilər hesab edirlər ki, İspaniyanın koordinasiya mexanizmindən çıxarılması və ardınca səslənən bu bəyanat İsrailin beynəlxalq təzyiqlərə qarşı daha sərt siyasi xətt seçdiyini ortaya qoyur. Bu isə yaxın dövrdə İsrailin bəzi Avropa paytaxtları ilə münasibətlərində yeni gərginliklərin yaranması ehtimalını artırır.
Poliqon.info
