ABŞ Prezidenti Donald Trampın atəşkəs danışıqlarının uğursuzluğundan sonra donanmanın Hörmüz boğazını blokadaya alacağını bildirməsi ardından neft qiymətləri bazar ertəsi Asiya ticarəti zamanı kəskin artaraq yenidən bir bareli 100 dolları keçib.
Banker.az xəbər verir ki, Brent markalı neft fyuçersləri 06:58 radələrində 7.3% artaraq 102.15 dollar/barelə yüksəlib. Gün ərzində qiymət daha əvvəl 103.87 dollar/barelə qədər qalxıb.
ABŞ hərbçiləri bazar ertəsi Bakı vaxtı ilə 18:00 etibarilə İran limanlarına daxil olan və çıxan bütün dəniz nəqliyyatına blokada tətbiq etməyə başlayacaq. Bu barədə Mərkəzi Komandanlıq məlumat yayıb. Qərar Donald Trampın Hörmüz boğazının blokadaya alınması əmri verməsindən sonra qəbul edilib.
Mərkəzi Komandanlığın açıqlaması Trampın əvvəlki, boğazdan keçməyə cəhd edən bütün gəmilərin blokadaya alınacağı ilə bağlı bəyanatına nisbətən daha yumşaq addım kimi qiymətləndirilir.
Bu hadisələr həftəsonu Pakistanda keçirilən ABŞ-İran atəşkəs danışıqlarının nəticəsiz başa çatmasından sonra baş verib. Əsas mübahisə mövzuları İranın nüvə fəaliyyəti, Hörmüz boğazının yenidən açılması və Tehranın regiondakı proksi qruplara, o cümlədən Hizbollaha dəstəyinin dayandırılması olub.
ABŞ nümayəndə heyətinə rəhbərlik edən vitse-prezident Cey Di Vens 21 saat davam edən danışıqların nəticəsiz qalmasından sonra bazar günü Pakistanı tərk edib.
ABŞ və İran arasında davam edən gərginlik, həmçinin Hörmüz boğazının tam blokadası qlobal neft bazarında təchizatın uzunmüddətli pozulacağına işarə edir. İran münaqişənin fevralın sonlarında başlamasından bəri faktiki olaraq boğazı bağlayıb və bu da dünya neft tədarükünün təxminən 20%-nin kəsilməsinə səbəb olub.
İran ABŞ-la gələcək nüvə danışıqları aparmaq niyyətində olmadığını bildirib. Donald Tramp isə Tehranın danışıqlar masasına qayıdıb-qayıtmamasının onun üçün əhəmiyyət daşımadığını deyib.
Bununla belə, “The Wall Street Journal” yazır ki, Yaxın Şərq ölkələri yaxın günlərdə Vaşinqton və Tehran arasında yeni atəşkəs danışıqlarına vasitəçilik etməyə çalışır.
