Bakı, 15 aprel, AZƏRTAC
Rusiya bankları 2026-cı ilin ilk üç ayında 483 filial bağlayıb. Bu göstərici illik müqayisədə 2,6 dəfə artıb.
AZƏRTAC TASS-a istinadla xəbər verir ki, “İzvestiya” qəzeti bu barədə Rusiya Mərkəzi Bankının məlumatlarına əsasən bildirib.
Qəzetin məlumatına görə, həmin dövrdə filialların ümumi sayı 21.870-ə düşüb. Rusiya Mərkəzi Bankı bu ixtisarların bankların xərcləri azaltması və gəlirliliyi artırmasına imkan verən uzaqdan bankçılığa keçid ilə əlaqəli olduğunu izah edib.
Mərkəzi Bank əlavə edib ki, bu tendensiyanı dəstəkləyir, lakin vəziyyətin rusiyalılar üçün narahatlıq yaratmamasını təmin edir. İnternet kəsintiləri də nəzərə alınır və kredit təşkilatlarına ünvanlı yardım göstərilməsi işləri aparılır.
Yanvar ayının sonunda “İzvestiya” Rusiya Federasiyası Mərkəzi Bankının məlumatlarına istinadla bildirmişdi ki, Rusiya bankları 2025-ci ilə qədər rekord sayda - 1700 filial bağlayıb və onların sayı 22.300-ə düşüb.
