Türkiyə hüquq-mühafizə orqanlarının əməkdaşları Kahramanmaraş şəhərində məktəbə silahlı hücum edən səkkizinci sinif şagirdinin atasını saxlayıblar.
"Unikal" xəbər verir ki, İsa Aras Mersinlinin atası, keçmiş polis zabiti Uğur Mersinli dindirilmək üçün gətirilib.
İlkin məlumatlara zidd olaraq, hücum edən şəxs saxlanılmayıb, intihar edib. O, məktəbə beş tapança və yeddi sursat maqazini ilə gəlib. Silahların oğlanın atasına məxsus olduğu güman edilir.
Bu arada, Aysel Çalık Liseyində baş verən atışmada həlak olan dörd nəfərdən üçünün şagird, birinin isə müəllim olduğu məlum olub.
Vitse-prezident Cevdet Yılmaz bildirib ki, bütün müvafiq qurumlar, əsasən daxili işlər, ədliyyə və milli təhsil nazirlikləri hadisənin bütün təfərrüatlarını müəyyən etmək üçün hərtərəfli araşdırma və yoxlamalar aparır.
