Yaşayış binalarının tikintisi və satışı ilə məşğul olan “Kristal Bakı” ASC-də qanun pozuntusu aşkarlanıb.
Banker.az xəbər verir ki, bu barədə Azərbaycan Mərkəzi Bankı tərəfindən aparılan cari nəzarət tədbirləri çərçivəsində məlum olub.
Belə ki, şirkət tərəfindən hesabatların qanunvericiliklə müəyyən edilmiş müddətdə təqdim olunmaması və Məlumatların Elektron Açıqlanması Sistemi vasitəsilə ictimaiyyətə açıqlanması qaydalarının pozulması halları müəyyən edilib.
Nəticədə, 3 noyabr 2025-ci il tarixli məhkəmə qərarına əsasən, qurum İnzibati Xətalar Məcəlləsinin 422-ci maddəsinə uyğun olaraq 2500 manat məbləğində cərimə olunub.
2024-cü ili 3.27 mln. manat məbləğində xalis zərər ilə başa vurub. Bu 2023-cü ildəki 15.45 mln. manatlıq zərərlə müqayisədə az olsa da, şirkətin kapitalında kəsr yaradıb.
Xatırladaq ki, “Kristal Bakı” ASC 19 mart 2020-ci il tarixində qeydiyyata alınıb və yaradılıb. ASC səhmlərinin 50%-i Vəliyev Pərviz Ağalar oğluna, 25%-i Nəbiyev Fərid Elbrus oğluna, 25%-i isə Nəbiyev Araz Mahayət oğluna məxsusdur. Yekun nəzarəti Vəliyev Pərviz həyata keçirir.
