ABŞ Prezidenti Donald Trampın İrana qarşı tətbiq etdiyi “polad halqa” blokadası və sarsıdıcı sanksiyalar fonunda rəsmi Vaşinqtonun böyük bir diplomatik gedişə hazırlaşdığı iddia edilir.
NOCOMMENT.az xəbər verir ki, “Politico” nəşri Trampın Tehranla razılığa gəlmək naminə müəyyən güzəştlərə getməyə yaşıl işıq yandırdığını yazır.
Məlumata görə, Prezident Tramp hər nə qədər “bütün kozırlar mənim əlimdədir” desə də, pərdəarxası danışıqlarda daha çevik mövqe nümayiş etdirir. Danışıqların gedişatına bələd olan Fars körfəzi ölkələrindən birinin yüksək rütbəli rəsmisi nəşrə bildirib ki, Tramp bu uzunmüddətli münaqişəni öz şərtləri daxilində qapatmaq üçün ciddi kompromislərə hazırdır. Onun əsas məqsədi regiondakı hərbi yükü azaltmaq və İranı yeni, daha genişmiqyaslı bir müqaviləyə razı salmaqdır.
Lakin bu “böyük sövdələşmə”nin qarşısında ciddi bir maneə dayanır: İmic məsələsi. Mənbələr qeyd edir ki, İrandan hələlik Trampın həm daxili auditoriya, həm də müttəfiqləri qarşısında “simasını qorumağa” imkan verəcək bir təklif gəlməyib. Tehranın nüvə məsələsində danışıqlardan imtina etməsi və Trampın İranın nüvə infrastrukturunu məhv etmək hədələri bu diplomatik gedişin risklərini artırır.
Analitiklər hesab edirlər ki, “Politico”nun bu xəbəri Trampın məşhur “Sövdələşmə Sənəti” strategiyasının bir hissəsidir. Öncə maksimum təzyiqlə rəqibi küncə sıxışdırmaq, sonra isə “güzəşt” adı altında öz şərtlərini qəbul etdirmək. Hazırda dünyanın diqqəti Tehranın bu “gizli zeytun budağı”na necə reaksiya verəcəyinə və Hörmüz boğazındakı dəniz blokadasının bu danışıqlar fonunda yumşalıb-yumşalmayacağına yönəlib.
Sara,
NOCOMMENT.az
