Ötən gün Ukraynanın paytaxtı Kiyevdə baş verən atışmanın təfərrüatı bəlli olub.
"Ölkə.az" xəbər verir ki, bu barədə daxili işlər naziri İqor Klimenko brifinqdə danışıb.
Nazirin sözlərinə görə, 1968-ci il təvəllüdlü, ehtimal ki, təqaüdçü olan Dmitri Vasilçenkov hadisə yerinin yaxınlığında yaşayırmış:
“Atəş açan şəxs heç bir tələb irəli sürməyib. Onunla 40 dəqiqə danışıblar və orada kimsə yaralandığı üçün supermarketə turniket gətirməyi təklif ediblər.
"Amma o, cavab verməyib. Buna görə də, xüsusən də bir girovu vurduqdan sonra onu məhv etmək əmri verildi".
Eyni zamanda, nazir silahlının qeyri-sabit hərəkət etdiyini qeyd edib:
"O, sadəcə insanlara dəqiq atəş açıb, onlara yaxınlaşıb və vurub. Buna görə də, onların sağ qalma şansı çox az idi".
Bildirilib ki, azad edilmiş bütün girovlar səhiyyə müəssisələrinə aparılıb.
Polis, Ukrayna Milli Polisi və Təhlükəsizlik Xidmətinin müstəntiqləri, məhkəmə ekspertləri, it baxıcıları və bomba zərərsizləşdirmə mütəxəssisləri hazırda hadisə yerində işləyirlər. Prokurorluq hadisənin təsnifatını müəyyən edəcək.
Baş prokuror Ruslan Kravçenko isə hadisəni terror aktı kimi qiymətləndirib və araşdırmalara başlanıldığını açıqlayıb.
Ukrayna Prezidenti Vladimir Zelenski isə videomüraciətində bildirib ki, terrorçu əvvəllər cinayət məsuliyyətinə cəlb edilib. Zelenski bildirib ki, o, uzun müddət Donetsk vilayətində yaşayıb və Rusiyada anadan olub:
"İndi onunla bağlı hər şey, o cümlədən niyə bu qədər cinayət törətdiyi də aydınlaşdırılır. Hər bir detal yoxlanılmalıdır. Müstəntiqlərin bir neçə nəzəriyyəsi var. Onun bütün elektron cihazları, telefonu və bütün əlaqələri yoxlanılacaq”.
Onun sözlərinə görə, terrorçu hücumdan əvvəl yaşadığı mənzili yandırıb.(axar.az)
