Azərbaycanın bədii üzgüçülük komandasına yeni məşqçi cəlb olunub.
Bu barədə NOCOMMENT.az-a Azərbaycan Üzgüçülük Federasiyasından (ASF) məlumat verilib.
ASF Yekaterina Matviyenko ilə əməkdaşlığa start verdiyini açıqlayıb.
Y.Matviyenko bu postda Oksana Pismennanı əvəzləyib.
Son illərdə Krasnodar şəhərində bədii üzgüçülük klubunun baş məşqçisi olmuş Y.Matviyenko təyinatı ilə bağlı fikirlərini bölüşüb: “Mən dünyanın ən güclü bədii üzgüçülük ənənələrindən birinə malik olan Rusiya məktəbini təmsil edirəm və məqsədim qazandığım zəngin təcrübəni Azərbaycanda tətbiq edərək həm Bakıda, həm də regionlarda bədii üzgüçülüyün texniki bazasının möhkəmlənməsinə, peşəkar inkişafına və kütləviləşməsinə töhfə verməkdir”.
Xatırladaq ki, bədii üzgüçülük üzrə idman ustası müxtəlif illərdə Ukrayna, Misir və Rusiyada məşqçi kimi çalışıb, o cümlədən Misirin Olimpiya və yeniyetmələrdən ibarət bədii üzgüçülük üzrə milli komandalarında fəaliyyət göstərib.
