Trampın xüsusi nümayəndəsi Paolo Zampolli FIFA-dan iyun ayında başlayacaq Dünya Kubokunda İtaliyanın İranı əvəz etməsinə icazə verməsini istəyib.
Musavat.com xəbər verir ki, məlumatı Financial Times və NBC News yayıb.
FT mənbələrinin məlumatına görə, təklif həm FIFA prezidenti Canni İnfantinoya, həm də turnirə birgə ev sahibliyi edən ölkənin lideri kimi ABŞ prezidenti Donald Trampa edilib.
Zampolli qeyd edib ki, İtaliyanın əvvəllər qazandığı dörd Dünya Kuboku titulu onların bu finalda iştirakına əsas verir. Mənbələr bildirirlər ki, bu plan, ABŞ prezidentinin İranla müharibəyə görə Papa XVI Leoya hücumları fonunda aralarında yaranan fikir ayrılığından sonra Trampla İtaliyanın baş naziri Corciya Meloni arasında münasibətləri bərpa etmək cəhdi olub.
Zampolli özü də nəşrə belə təkliflə çıxış etdiyini təsdiqləyib: "Tramp və İnfantinoya Dünya Kubokunda İranı İtaliyanın əvəz etməsini təklif etdiyimi təsdiqləyirəm. Mən doğumdan italyanam və İtaliya komandasını ABŞ-ın ev sahibliyi etdiyi turnirdə görmək xoş olardı. Dörd titulla onlar finala daxil olmağa layiq olan bütün lazımi keyfiyyətlərə malikdirlər".
FT əlavə edib ki, İranı İtaliya ilə əvəz etmək qərarı İtaliya komandasının ABŞ, Meksika və Kanadada keçiriləcək Dünya Kubokuna vəsiqə qazana bilməməsindən sonra verilib.
Aprelin 22-də İran Futbol Federasiyasının prezidenti Mehdi Tac ölkənin turnirə hazır olduğunu və iştirak etməyi planlaşdırdığını bildirən bir bəyanat yayıb:
"Reallıq budur ki, biz Dünya Kubokuna hazırlaşırıq. Hazırlaşırıq. Hətta bu gün də təlim-məşq toplanışında idik və oyunçularımız artıq oradadır. Amma nəticə etibarilə, bilirsiniz ki, biz sistemin bir hissəsiyik. Dövlət hansı qərarı verirsə versin, biz onu həyata keçirəcəyik".
Qeyd etmək lazımdır ki, martın əvvəlində İran ABŞ və İsrailin hava hücumlarından sonra turnirdə iştirak etməyəcəyini açıqlayıb. Tehran Amerikaya səyahət edəcək idmançılarının təhlükəsizlik problemlərini önə çəkib.
Bu fonda İran Futbol Federasiyası oyunların Kanadaya və ya Meksikaya köçürülməsinitəklif etdi, lakin FİFA bu fikri rədd etdi.
ABŞ prezidenti Donald Tramp öz növbəsində İran futbolçularının ABŞ-a "xoş gəldiniz" desə də, bunun onlar üçün uyğunsuz və potensial təhlükəli olacağını qeyd edib.
FİFA Trampın səfirinin səyləri ilə bağlı şərh verməkdən imtina edib, lakin onlar təşkilatlarının prezidentinin ötən həftə verdiyi son açıqlamanı qeyd ediblər:
"İran komandası mütləq gələcək. Ümid edirik ki, o vaxta qədər vəziyyət sakitləşəcək. Bu, mütləq kömək edəcək. Amma İran öz millətini təmsil etmək istəyirsə, gəlməlidir. Onlar vəsiqə qazanıblar. Onlar həqiqətən oynamaq istəyirlər və oynamalıdırlar".
Musavat.com
