Avropada internet daha çox əyləncə üçün istifadə olunur

Avropa ölkələrində internetdən istifadə səviyyəsi yüksək olsa da, ondan təhsil və məlumatlanma məqsədləri üçün deyil, daha çox əyləncə və sosial ünsiyyət üçün istifadə edildiyi müşahidə olunur. Bu barədə rəsmi statistik məlumatlara əsaslanan təhlildə bildirilir. Rumıniya nümunəsində bu tendensiya daha aydın görünür.

AZƏRTAC xəbər verir ki, Rumıniyada internetə çıxış səviyyəsi yüksəkdir və əhalinin böyük hissəsi onlayn mühitdən istifadə edir. Bununla yanaşı, istifadə istiqamətləri əsasən sosial şəbəkələr, videoplatformalar və gündəlik ünsiyyətlə məhdudlaşır.

Statistika göstərir ki, təhsil, peşəkar inkişaf və məlumatlanma məqsədli istifadə nisbətən aşağı səviyyədə qalır. Bu isə rəqəmsal texnologiyaların potensialından tam istifadə olunmadığını göstərir.

Məlumatda qeyd olunur ki, internetdən bu cür istifadə modeli uzunmüddətli perspektivdə əmək bazarına və iqtisadi inkişafa təsir göstərə bilər. Rəqəmsal bacarıqların kifayət qədər inkişaf etməməsi və onlayn mühitdən daha çox əyləncə üçün istifadə edilməsi ölkələrin rəqabət qabiliyyətinə təsir göstərən amillərdən biri kimi qiymətləndirilir.

Eyni zamanda, rəqəmsal mühitdə risklər diqqət çəkir. Xüsusilə gənclər arasında zərərli məzmunla qarşılaşma halları geniş yayılıb və bu da rəqəmsal savadlılığın artırılmasının vacibliyini ön plana çıxarır.

Qeyd olunur ki, Avropada internetdən istifadənin geniş yayılması ilə yanaşı, onun daha məqsədyönlü və faydalı istiqamətlərdə tətbiqinin təşviqi prioritetlərdən biri olaraq qalır. Bu baxımdan təhsil proqramlarının gücləndirilməsi və rəqəmsal bacarıqların inkişaf etdirilməsi böyük əhəmiyyət daşıyır.

_{İqbal Hacıyev}