ain.az, Azertag portalına istinadən məlumat verir.
Kiyev, 24 aprel, AZƏRTAC
Ukrayna operatordan yüzlərlə və minlərlə kilometr uzaqlıqdakı düşmən hədəflərini vurmağa imkan verən, tutucu dronlar üçün məsafədən idarəetmə texnologiyasını sistematik şəkildə genişləndirməyə başlayıb.
AZƏRTAC xəbər verir ki, bu barədə Ukraynanın müdafiə naziri Mixail Fedorov məlumat verib.
Onun sözlərinə görə, Ukrayna dünyada dron tutucularının məsafədən idarə olunmasını sistematik şəkildə genişləndirən ilk ölkə olub.
Bu texnologiyanın əsas xüsusiyyəti pilotun artıq cəbhə xəttindəki müəyyən bir mövqeyə bağlı olmamasıdır. Pilotsuz təyyarə arxa cəbhə şəhərlərində Kiyev, Lvov və ya hətta xaricdən təhlükəsiz mühitdən idarə olunur.
Fedorov qeyd edib ki, bu həll yolu təkcə hava hücumundan müdafiənin effektivliyini artırmaqla yanaşı, həm də Ukrayna operatorlarının həyatı üçün riskləri əhəmiyyətli dərəcədə azaldır.
"Bu, müdafiə innovasiyalarının tətbiqinin və yeni hava hücumundan müdafiə standartının formalaşmasının bir nümunəsidir. Təmas xəttinə bağlı olmadan imkanları genişləndirə bilərik", - deyə müdafiə naziri vurğulayıb.
Bu günə qədər 10-dan çox Ukrayna istehsalçısı artıq məsafədən idarəetmə həllərini öz sistemlərinə inteqrasiya edib. Bu texnologiyanın inkişafı bir il əvvəl başlayan “Brave1” klaster təşəbbüsü sayəsində mümkün olub.
Müdafiə Nazirliyi kiçik hava hücumundan müdafiə sistemlərinin inkişafı çərçivəsində düşmən hədəflərinin 100 faiz aşkarlanmasına və ən azı 95 faiz zərərsizləşdirilməsinə nail olmağı hədəfləyir.
"Prezidentin göstərişlərinə əməl edərək, Ukrayna səmasını qorumaq üçün innovasiyaları inkişaf etdirməyə davam edirik. Bu gün sübut olunmuş bir nəticəmiz var: yüzlərlə və minlərlə kilometr məsafədəki hədəflərin vurulması", - deyə nazirlik rəhbəri qeyd edib.
Emil Hüseynli
AZƏRTAC-ın xüsusi müxbiri
Kiyev
Sonrakı hadisələr barədə daha çox məlumat almaq üçün ain.az saytını izləyin.
