Bizimyol portalından verilən məlumata əsasən, ain.az bildirir.
Ermənistanın baş naziri Nikol Paşinyan Osmanlı imperiyasında ermənilərə qarşı törədildiyi iddia edilən hadisələrin 111-ci ildönümü münasibətilə vətəndaşlara müraciətində bildirib ki, baş verənlər erməni xalqının beynəlxalq intriqalara cəlb olunmasının nəticəsidir.
Bizimyol.info xəbər verir ki, Baş nazirin sözlərinə görə, vətəndaşların tapşırığı ilə hökumət keçmişdə yaşananları və tarixdə təkrarlanan hadisələri daha dərindən anlamaq, onların yenidən baş verməsinin qarşısını almaq və gələcəyi daha işıqlı etmək istiqamətində qətiyyət nümayiş etdirib. O bildirib ki, bu məqsədə nail olmaq üçün əsas addımlardan biri “Böyük faciə”nin beynəlxalq oyunçuların bir-birinə qarşı mübarizə alətinə çevrilməsinə imkan verməmək olub.
Paşinyan bildirib ki, Milli Elmlər Akademiyasının nəşr etdiyi materialda əsaslandırılmış şəkildə göstərilir ki, hadisələr digər amillərlə yanaşı, erməni xalqının XIX əsrin ortalarından başlayan və 1915-ci ildə zirvəyə çatan beynəlxalq intriqalara cəlb olunmasının nəticəsidir.
Onun sözlərinə görə, hər il aprelin 24-də on minlərlə insan "Tsitsernakaberd" memorial kompleksini ziyarət edir və hökumətin siyasəti də məhz bu yanaşmaya əsaslanır. Paşinyan hesab edir ki, bunun təkrarlanmamasının əsas təminatları dövlətçilik və sülhdür.
Baş nazir vurğulayıb ki, bu tarixi məqsədə çatmaq üçün beynəlxalq səviyyədə tanınmış ərazilərdən kənarda “vətən axtarışına” son qoymaq lazımdır. Onun fikrincə, "itirilmiş torpaqların" qaytarılması, sərhədlərin bərpası və “tarixi ədalət” şüarları ilə çıxış edən qüvvələr ölkəni 1878-ci il San-Stefano müqaviləsi kontekstinə qaytarır və bunun sonu dövlətçiliyin və vətənin itirilməsi ilə nəticələnə bilər.
Qeyd edək ki, Paşinyan 2024-cü ildə də vətəndaşlara müraciətində 1915-ci il hadisələrini ilk dəfə olaraq geosiyasi intriqaların nəticəsi kimi qiymətləndirmişdi.
"Erməni soyqırımı" Birinci dünya müharibəsi (1914–1918) illərində Osmanlı imperiyasında erməni əhalinin kütləvi deportasiyası və qırğınları kimi xarakterizə olunur. Bunun təşkilatçıları kimi 1913-cü ildən hakimiyyətdə olan “İttihad və Tərəqqi” partiyasının liderləri — Ənvər paşa, Tələt paşa və Camal paşa göstərilir.
Müasir Türkiyə hökuməti ermənilərin kütləvi şəkildə həlak olduğunu qəbul etsə də, hadisələrin “soyqırımı” kimi adlandırılmasına qarşı çıxır və erməni tərəfinin irəli sürdüyü 1,5 milyon qurban rəqəmini şişirdilmiş hesab edir.
Bundan əvvəl Türkiyə ilə diplomatik münasibətlərin qurulması və sərhədlərin açılması üzrə danışıqlar fonunda Ermənistan hakimiyyəti bəyan edib ki, rəsmi İrəvan "erməni soyqırımı"nın beynəlxalq səviyyədə tanınması siyasətini aparmır. Paşinyan çıxışlarının birində Birinci dünya müharibəsi illərində ermənilərin mövqeyinin də nəzərdən keçirilməli olduğunu bildirmişdi ki, bu, müxalifət və bir sıra ictimai təşkilatlar tərəfindən "soyqırımı" deyiminin inkarına yönəlmiş addım kimi qiymətləndirilib.
Qeyd edək ki, Paşinyanın rəhbərlik etdiyi “Vətəndaş Müqaviləsi” partiyasının seçki proqramında "erməni soyqırımı" ilə bağlı xüsusi qeyd yer almır.
Qadir, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
