XX əsrin əvvəllərində Rusiya imperiyasının ən sərt cəza məkanlarından biri hesab olunan Saxalin ilə bağlı mühüm qərar qəbul edilib.
Musavat.com xəbər verir ki, 1906-cı ildə imperator Nikolay II məhkumların bu adaya katorqa və sürgün məqsədilə göndərilməsinin dayandırılması haqqında fərmanı təsdiqləyib.
Uzun illər ərzində Saxalin ağır əmək düşərgəsi kimi fəaliyyət göstərib. Buraya göndərilən məhbuslar mədənlərdə, tikinti sahələrində işlədilir, sərt iqlim və təcrid şəraitində yaşayırdılar. Adanın uzaqlığı və qaçışın demək olar ki, mümkünsüz olması onu faktiki “açıq həbsxana”ya çevirirdi.
Məşhur rus yazıçısı Anton Çexov da 1890-cı ildə Saxalinə səfər edərək burada gördüklərini “Saxalin adası” adlı əsərində təsvir etmiş, məhbusların ağır vəziyyətini ictimaiyyətə çatdırmışdı.
Tarixçilərin fikrincə, məhz bu kimi ifşalar və imperiya daxilində artan islahat ehtiyacı nəticəsində 1906-cı il fərmanı qəbul edildi. Qərardan sonra Saxalinin cəza koloniyası kimi rolu zəifləməyə başladı və ada tədricən mülki yaşayış məkanına çevrildi.
Musavat.com
