2025-ci ildə qlobal hərbi xərclərin 51%-i ABŞ, Çin və Rusiyanın payına düşüb. Bu üç ölkənin ümumi müdafiə xərcləri 1,48 trilyon dollar təşkil edib.
BAKU.WS xəbər verir ki, bu barədə Stokholm Beynəlxalq Sülh Araşdırmaları İnstitutu (SIPRI) tərəfindən yayımlanan hesabatda bildirilib.
Məlumata görə, ümumilikdə dünyada hərbi xərclər 2025-ci ildə 2,88 trilyon dollara yüksəlib. Beləliklə, artım artıq ardıcıl olaraq 11-ci ildir davam edir. Hərbi xərclərin qlobal ÜDM-də payı 2,5%-ə çataraq 2009-cu ildən bəri ən yüksək səviyyəyə yüksəlib.
Hesabata əsasən, ABŞ-nin müdafiə xərcləri 954 milyard dollar olub ki, bu da əvvəlki illə müqayisədə 7,5% azalma deməkdir. SIPRI bu azalmanı il ərzində Ukraynaya yeni maliyyə yardımının təsdiqlənməməsi və ölkənin yenilənmiş milli təhlükəsizlik strategiyasındakı prioritetlərlə izah edir.
Bununla yanaşı, ABŞ həm nüvə, həm də ənənəvi hərbi potensialına investisiyaları artırmaqda davam edib. Məqsəd Qərb yarımkürəsində üstün mövqeyini qorumaq və Hind-Sakit okean regionunda Çinin təsirini məhdudlaşdırmaqdır ki, bu da yeni milli təhlükəsizlik strategiyasının əsas istiqamətlərindən biri kimi göstərilir.
