Böyük Britaniya hökuməti Rusiya prezidenti Vladimir Putinə qarşı Şimali Avropa müttəfiqlərinin yenidən silahlanmasını maliyyələşdirmək üçün "müdafiə bankı" yaradılması planlarını nəzərdən keçirir...
Poliqon xəbər verir ki, bu barədə The Telegraph yazır.
Nəşrin məlumatına görə, layihə Avropa İttifaqının 150 milyard avroluq kredit proqramına bənzər model əsasında qurula bilər və üzv ölkələrin silah alımlarını maliyyələşdirməyə yönələcək.
"JEF (Joint Expeditionary Force – Birgə Ekspedisiya Qüvvələri) bankı planı NATO-nun 10 Şimali Avropa ölkəsindən ibarət alyansına müdafiə layihələrini maliyyələşdirməyə, aşağı faizlə kreditlər götürməyə imkan verəcək", deyə məqalədə bildirilir.
JEF-ə Böyük Britaniya ilə yanaşı Norveç, Finlandiya, İsveç, Estoniya, Latviya, Litva, Danimarka, İslandiya və Niderland daxildir.
Qeyd olunur ki, keçən ay JEF üzvlərindən üçü – Böyük Britaniya, Finlandiya və Niderland – müdafiə sənayesinin gücləndirilməsi, silah alımları və Ukraynaya hərbi yardımın artırılması üçün yeni maliyyə mexanizmi üzərində işləməyə razılaşıb.
Prosesə yaxın mənbənin sözlərinə görə, danışıqlar hələ ilkin mərhələdədir. Həmçinin bildirilir ki, mümkün elan NATO liderlərinin iyulda Türkiyənin Ankara şəhərində keçiriləcək sammitinə qədər sürətləndirilə bilər.
Sammitdə ABŞ prezidenti Donald Trampın NATO ölkələrinə müdafiə xərclərini ÜDM-in 5%-nə qədər artırmaq çağırışlarının əsas müzakirə mövzusu olacağı gözlənilir.
Nəşr qeyd edir ki, Trampın sammitdə iştirak edib-etməyəcəyi hələ də qeyri-müəyyəndir.
NATO baş katibi Mark Rütte isə üzv ölkələrdən müdafiə xərcləri üzrə öhdəlikləri yerinə yetirmək üçün konkret planlar gözlədiyini bildirib.
Məlumata görə, Böyük Britaniya 2029–2030-cu ilə qədər müdafiə xərclərini ÜDM-in 3%-nə çatdırmaq üçün 17,6 milyard funt sterlinq tapmaqda çətinliklərlə üzləşə bilər.
Böyük Britaniyanın maliyyə naziri Reyçel Rivz "müharibə istiqrazları" satışı vasitəsilə vəsait cəlb etmə variantını da nəzərdən keçirir.
JEF çərçivəsində bu maliyyə modelinin genişləndirilməsi kredit reytinqini yaxşılaşdıraraq borclanmanı ucuzlaşdıra bilər.
Nəşrin yazdığına görə, bütün vəsaitlər Rusiya təhlükəsinə qarşı Şimali Atlantika, Arktika və Baltik regionlarında birgə müdafiə layihələrinə yönəldiləcək.
Britaniya rəsmisi bildirib ki, ölkə müdafiə xərclərini artıraraq ordunun hazırlığını gücləndirmək niyyətindədir və bu, Soyuq müharibədən bəri ən böyük artımdır.
Poliqon.info
