Livanın silahlı qruplaşmasının lideri Qasem müqaviməti davam etdirəcəklərini bəyan edib, İranın mövqeyini vurğulayıb və müharibənin davam edəcəyini bildirib…
Poliqon xəbər verir ki, Hizbullah hərəkatının baş katibi Naim Qasem bəyan edib ki, qruplaşma birbaşa danışıqlarda iştirak etməyəcək və müqaviməti davam etdirəcək.
Onun sözlərinə görə, düşman çıxılmaz vəziyyətə düşüb və müqavimət nə qədər güclü olsa da, qırıla bilməz. Qasem vurğulayıb ki, birbaşa danışıqlara qətiyyən qarşıdırlar və Livandakı hakimiyyət sahibləri bu cür addımların nə Livana, nə də özlərinə fayda verməyəcəyini anlamalıdırlar.
“Həm müdafiə, həm də döyüş meydanı bizim qarşıdurmaya hazır olduğumuzu sübut edir”, deyə Naim Qasem silahı yerə qoymayacaqlarını bildirib.
Qasem həmçinin qeyd edib ki, İranın mövqeyi olmadan Pakistanda aparılan danışıqlar çərçivəsində atəşkəs əldə olunması mümkün deyildi.
Hizbullah lideri əlavə edib ki, birbaşa danışıqlar tamamilə istisnadır və Hizbullah təcavüzə cavab olaraq müqavimətini davam etdirəcək. Bu açıqlama İranın Mehr agentliyi tərəfindən yayılıb.
Poliqon.info
