NASA istifadəçilərə adlarını Yer kürəsinin real landşaftlarından formalaşdırmağa imkan verən “Your Name in Landsat” adlı tətbiq hazırlayıb. Bu barədə “Pulsfid” yazır.
Jurnalistlərin məlumatına görə, layihə bu il aprelin 25-də istifadəyə verilib və 22 aprel tarixində qeyd olunan Yer Gününə həsr olunub. Adların yaradılması üçün tətbiq NASA Earth Observatory, USGS EarthExplorer, Worldview və ESA Sentinel Hub arxivlərindəki məlumatlardan istifadə edir.
“Çaylar, göllər və dağlarla yazılmış ad. <...> Adın hər bir hərfi sadəcə şəkil deyil. Bu, Yer səthinin real bir hissəsidir”, – materialda vurğulanır.
Qeyd olunur ki, amerikalı mütəxəssislər tərəfindən hazırlanmış alqoritm Landsat peykləri tərəfindən çəkilmiş milyonlarla görüntünü analiz edir və hərflərə bənzər təbii formaları tapır. Məsələn, çay deltaları “Y”, dağ silsilələri isə “K” kimi istifadə olunur.
NASA-da bildirilib ki, bu layihə yalnız əyləncə məqsədi daşımır, həm də insanların ekoloji maarifləndirilməsi üçün bir vasitədir. O, insanla onun planeti arasında əlaqə yaratmağa kömək edir.
“Müşahidəçilər abstrakt şəkillər deyil, ‘öz’ çaylarını, ‘öz’ dağlarını görürlər. Bu isə Yerə qarşı məsuliyyət hissi yaradır”, – deyə məqalədə qeyd olunur.
Layihə müəllifləri əlavə ediblər ki, yeni funksiya artıq sosial şəbəkələrdə viral olub. Müvafiq paylaşımlar Google və digər platformalarda trendə çevrilib. Tətbiqdən pulsuz istifadə etmək mümkündür.
