ABŞ və İran arasında vasitəçilik edilən danışıqların davam etdiyi, lakin prosesin hələ də həssas mərhələdə olduğu bildirilir.
Redaktor.az xəbər verir ki, CNN mənbələrə istinadən məlumat yayıb.
Məlumata görə, ABŞ və İran Pakistanda ikinci danışıqlar raundunu keçirə bilməsələr də, tərəflər arasında diplomatik təmasların tam dayanmadığı və pərdəarxası intensiv müzakirələrin davam etdiyi qeyd olunur.
CNN-in yazdığına əsasən, mümkün razılaşmanın ilkin mərhələsi müharibədən əvvəlki vəziyyətə qayıdışı və Hörmüz boğazının məhdudiyyət və rüsumlar olmadan yenidən açılmasını əhatə edə bilər.
Bundan sonra İranın nüvə proqramı üzrə danışıqların davam etdiriləcəyi bildirilir. ABŞ Prezidenti Donald Tramp isə istənilən razılaşmanın İranın yüksək zənginləşdirilmiş urandan imtina etməsini və uran zənginləşdirməni dayandırmasını nəzərdə tutmalı olduğunu bildirib. Tehran isə bu tələbləri qəbul etmir.
Mənbələrin sözlərinə görə, vasitəçilər tərəfləri razılaşmaya yaxınlaşdırmağa çalışır və yaxın günlərin danışıqların gələcəyi üçün həlledici ola biləcəyi vurğulanır.
Aminə ŞAHSUVARQIZI
