Bişkekdə keçirilən görüşdə regional sabitlik və birgə müdafiə prioritetləri müzakirə olunub...
Poliqon xəbər verir ki, bu barədə Sinxua Agentliyi məlumat yayıb. Şanxay Əməkdaşlıq Təşkilatı (ŞƏT) üzv dövlətlərinin müdafiə nazirlərinin Bişkek şəhərində keçirilən iclasında təhlükəsizlik sahəsində əməkdaşlığın gücləndirilməsi ilə bağlı razılıq əldə olunub. Tərəflər regionda sülh və sabitliyin təmin edilməsi üçün strateji əlaqələrin dərinləşdirilməsi və praktiki əməkdaşlığın genişləndirilməsi niyyətlərini ifadə ediblər.
Çinin müdafiə naziri Dong Jun çıxışında təşkilat çərçivəsində əsas istiqamətlərin əhəmiyyətini vurğulayıb. O, xüsusilə qlobal inkişaf təşəbbüsü, qlobal təhlükəsizlik təşəbbüsü, qlobal sivilizasiya təşəbbüsü və qlobal idarəetmə təşəbbüsünün ŞƏT-in fəaliyyətində mühüm rol oynadığını qeyd edib.
Nazir bildirib ki, təşkilatın müdafiə siyasətində əsas məqsədlər beynəlxalq nizamın qorunması, təhlükəsizlik sahəsində idarəetmənin təkmilləşdirilməsi və birgə inkişaf vasitəsilə münaqişə və böhranların yaranma səbəblərinin aradan qaldırılmasıdır. Onun sözlərinə görə, bu yanaşma regionda uzunmüddətli sabitliyin təmin olunmasına xidmət edir.
Şanxay Əməkdaşlıq Təşkilatı 15 iyun 2001-ci ildə Çin, Rusiya, Qazaxıstan, Tacikistan, Qırğızıstan və Özbəkistan liderləri tərəfindən yaradılıb. Hazırda təşkilata Belarus, Hindistan, İran, Qazaxıstan, Çin, Qırğızıstan, Pakistan, Rusiya, Tacikistan və Özbəkistan daxildir. Əfqanıstan və Monqolustan müşahidəçi statusuna malikdir, əlavə olaraq 15 dövlət ŞƏT ilə dialoq tərəfdaşı kimi əməkdaşlıq edir.
Ekspertlər hesab edir ki, ŞƏT çərçivəsində hərbi əməkdaşlığın genişləndirilməsi regionda təhlükəsizlik balansının qorunmasına və üzv ölkələrin kollektiv müdafiə imkanlarının artırılmasına yönəlib. Bu cür təşəbbüslər həm də geosiyasi çağırışlara qarşı koordinasiyalı cavab mexanizmlərinin formalaşdırılmasına şərait yaradır.
Poliqon.info
