Bakı, 29 aprel, AZƏRTAC
Aparıcı beyin mərkəzi xəbərdarlıq edir ki, İrandakı müharibənin yaratdığı enerji böhranı ən yaxşı ssenaridə belə, Böyük Britaniya iqtisadiyyatına 35 milyard funt sterlinqə (təxminən 46,7-47,3 milyard dollar) başa gələ bilər.
AZƏRTAC xarici mediaya istinadla xəbər verir ki, Milli İqtisadi və Sosial Tədqiqatlar İnstitutunun (NIESR) yeni bədbin proqnozlarına görə, regiondakı uzunmüddətli münaqişə bu ilin ikinci yarısında Böyük Britaniyada tənəzzülə səbəb ola bilər.
NIESR direktoru Devid Eykman bildirib ki, bu proqnozlar hökumətin Böyük Britaniyada iqtisadi artımı bərpa etmək planlarına ciddi zərbədir. O əlavə edib ki, Yaxın Şərqdəki böhran Böyük Britaniyanın qlobal enerji şoklarına qarşı son dərəcə həssas olduğunu açıq şəkildə nümayiş etdirib.
ABŞ və İsrailin İranla müharibəsi artıq Böyük Britaniyada iqtisadi artımın yavaşlaması və inflyasiyanın artması ilə bağlı qorxular yaradıb və İngiltərə Bankının bu yay faiz dərəcələrini hazırda olan 3,75 faizdən yuxarı qaldıracağı gözlənilir.
NIESR iyul ayında inflyasiyanın 4 faizə yüksələcəyini proqnozlaşdırır, lakin münaqişə davamlı inflyasiya təzyiqi göstərməyə davam edərsə, daha sonra bu rəqəm 5,25 faizə də çata bilər.
Hətta ən optimist ssenarisində belə, münaqişənin bu il həll olunacağını fərz etsək, təşkilat iqtisadi artımın bu il 0,9 faizə, gələn il isə 1 faizə qədər yavaşlayacağını proqnozlaşdırır ki, bu da ötən il qeydə alınan 1,4 faizdən aşağıdır.
NIESR bundan əvvəl cari ildə 1,4 faizlik, 2027-ci ildə isə 1,3 faizlik artım proqnozlaşdırırdı. Münaqişə tez bir zamanda başa çatsa belə, NIESR Böyük Britaniya iqtisadiyyatının 2026 və 2027-ci illərdə təxminən 35 milyard funt sterlinq (təxminən 46,7 milyard ABŞ dollarından 47,3 milyard ABŞ dollarına qədər) azalacağını təxmin edir ki, bu da Leyborist Partiyasının iqtisadi artım ambisiyalarına şübhə yaradır.
