Braziliyada yaxınlaşan prezident seçkiləri ölkənin iqlim siyasətində böyük rol oynayan “Tropical Forest Forever Facility” (TFFF) adlı meşələrin qorunması fondu üçün ciddi qeyri-müəyyənlik yaradıb. Bu layihə dünyanın tropik meşələrini qorumaq üçün ölkələrə maliyyə dəstəyi verməyi hədəfləyir.
QHT.az xarici mediaya istinadən bildirir ki, Braziliyada 4 oktyabrda keçiriləcək prezident seçkiləri ərəfəsində hazırkı prezident Luiz İnasio Lula da Silva ilə müxalif namizəd, keçmiş prezident Jair Bolsonaronun oğlu senator Flávio Bolsonaro arasında gərgin mübarizə gedir. Sorğulara görə, hər iki namizədin reytinqləri demək olar ki, bərabərdir.
TFFF təşəbbüsü ötən ilin noyabrında Lula tərəfindən COP30 çərçivəsində elan olunmuşdu. Planın əsas məqsədi ölkələrə meşələri kəsməmək üçün maliyyə ödəmələri etməkdir. Lula çıxışında bu təşəbbüsü “qlobal cənub ölkələrinin ilk dəfə meşə gündəliyində liderlik etməsi” kimi təqdim etmişdi.
Hazırda fondun büdcəsində təxminən 6,7 milyard dollar vəsait var. Lakin layihənin tam işləməsi üçün 2026-cı ilin sonuna qədər 10 milyard dollara ehtiyac var. Bundan əlavə, vəsaitləri idarə edəcək rəsmi mexanizm hələ tam formalaşdırılmayıb.
Ekspertlər bildirirlər ki, əgər seçkilərdə hakimiyyət dəyişsə və Bolsonaro tərəfi qalib gəlsə, Braziliyanın bu layihədən geri çəkilməsi ehtimalı var. Bu isə TFFF-in gələcəyini və COP30 çərçivəsində iqlim gündəliyini ciddi şəkildə zəiflədə bilər.
