ain.az xəbər verir, Azertag saytına əsaslanaraq.
Bakı, 29 aprel, AZƏRTAC
29 aprel Beynəlxalq Rəqs Günü münasibətilə AZƏRTAC gənc rəqqaslarla söhbət edib. “Xalq rəqsləri” ixtisası üzrə təhsil alan ikinci kurs bakalavr tələbəsi Darya Maslakova öz yolu, beynəlxalq layihələr və rəqsin onun şəxsiyyətini necə formalaşdırdığı barədə danışıb.
Darya dəfələrlə Azərbaycan mədəniyyətini beynəlxalq səviyyədə təmsil edib, TÜRKSOY layihələrində və “Korkut Ata Türk Dünyası Film Festivali”ndə iştirak edib, eləcə də beşdən çox ölkədə çıxış edərək beynəlxalq auditoriyanı Azərbaycan milli rəqsləri ilə tanış edib.
Onun yaradıcılıq portfoliosunda beynəlxalq müsabiqə və festivallarda iştirak, eləcə də mükafatlar və təşəkkürnamələr yer alıb. Onların arasında 2022-ci ildə Stokholmda onlayn keçirilən “Aurora” ifaçılıq və bədii sənət üzrə I Beynəlxalq Müsabiqə-Festival da var. Həmin vaxt Darya Xalq artisti Yusif Qasımovun rəhbərliyi ilə Bakı Xoreoqrafiya Akademiyasının “Bakı Ulduzları” ansamblının tərkibində çıxış edirdi.
Rəqsi nəyə görə seçdiyi barədə suala cavab olaraq Darya xatırlayır: “Uşaqlıqda Latın Amerikası rəqsləri ilə məşğul olmuşam. Amma bir gün xalam Viktoriya Şahmuradovanın çıxış etdiyi Dövlət Mahnı və Rəqs Ansamblının konsertinə getdim. Məhz o zaman ilk dəfə xalq rəqsini həqiqətən hiss etdim və ona aşiq oldum”.
Müsahibimizin sözlərinə görə, bundan sonra hər şey həlledici oldu. O, Bakı Xoreoqrafiya Akademiyasında təhsil alıb, səkkizinci sinfə daxil olub, daha sonra kollecə qəbul olub və bakalavr dərəcəsi alıb. Onun ilk müəllimi, formalaşmasında mühüm rol oynayan Azərbaycanın Xalq artisti Səbinə Qasımova olub.
“Elə anlar olurdu ki, hər şeyi tərk etmək istəyirdim. Lakin rəqs buraxmırdı. O, məni həmişə özünə geri qaytarırdı”, - deyə Darya qeyd edir.
Bu gün o özü Dövlət Mahnı və Rəqs Ansamblında, xalq sənətini ilk dəfə özü üçün kəşf etdiyi səhnədə çalışır.
Azərbaycan rəqs sənətinin gələcəyindən danışan müsahibimiz milli mədəniyyətin beynəlxalq səviyyədə qavranılmasının əhəmiyyətini vurğulayır: “Mənim üçün Azərbaycan rəqslərinin ölkənin hüdudlarından kənarda tanınması vacibdir. Mən şəxsən digər xalqların rəqslərini maraqla öyrənirəm. Bu, mədəniyyətin hərəkət vasitəsilə necə ötürüldüyünü daha yaxşı başa düşməyimə kömək edir. Rəqslərimizin də eyni maraq və hörmətlə qəbul edilməsini istərdim. Onların xarakterini qorumağa, eyni zamanda, təqdimatı geniş auditoriya üçün daha müasir və daha anlaşılan etməyə çalışıram”.
Darya qeyd edir ki, ansamblda həmçinin özbək, qazax, qırğız və digər milli rəqslər də ifa edilir ki, bu da onun peşəkar dünyagörüşünü genişləndirir.
Həyatının hansı rəqsə bənzədiyi sualına cavab verərək Darya deyir: “Bəzən lirik rəqslər kimi sakit, bəzən isə “Yallı” kimi sürətli tempdə olur. Səhnədə həmişə özümü toplayır və prosesə tam qərq oluram. Mənim üçün rəqsin həqiqi: emosiya və sevgi ilə qalması vacibdir”.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
