"İranın sonuncu şahı Məhəmmədrza Pəhləvinin oğlu Rza Pəhləvi tərəfindən səsləndirilən son bəyanatlar Orta Şərqdə gedən proseslər fonunda yenidən “rejim dəyişikliyi” mövzusunu aktuallaşdırıb. Onun xarici təzyiqlərin davam etdirilməsi ilə paralel olaraq hakimiyyətin “xalq tərəfindən ələ keçirilməsi” tezisi həm daxili sosial-siyasi dinamika, həm də beynəlxalq güc balansı çərçivəsində kompleks şəkildə təhlil edilməlidir. İlk növbədə onu qeyd etmək lazımdır ki, İran İslam Respublikasında son illərdə baş verən etirazlar, xüsusilə 2019-cu ildə baş vermiş sosial-iqtisadi narazılıqlar və 2022-ci ildə böyük səs-küyə səbəb olan hadisələr ölkədə struktur problemlərin mövcudluğunu açıq şəkildə nümayiş etdirmiş oldu. Bu etirazlarda yüksək inflyasiya, milli valyutanın dəyərsizləşməsi, işsizlik səviyyəsinin artması və sosial bərabərsizliklər əhali arasında narazılığı dərinləşdirən əsas amillər kimi çıxış edir. Bununla yanaşı, siyasi sistemin mahiyyət etibarilə mərkəzləşmiş və ideoloji xarakter daşıması, seçki institutlarının məhdud rəqabət mühiti ilə fəaliyyət göstərməsi və vətəndaş azadlıqlarının sərhədlənməsi etirazların davamlı sosial bazasını formalaşdırır".
Bu fikirləri Aznews.az-a açıqlamasında siyasi şərhçi Aytən Qurbanova deyib.
Xatırladaq ki, İranın sonuncu şahı Məhəmmədrza Pəhləvinin oğlu Rza Pəhləvi bildirib ki, ölkədə mövcud siyasi sistemə qarşı təzyiqlərin davam etdirilməsi zəruridir və bu prosesin nəticəsində hakimiyyətin sonda xalqın nəzarətinə keçə biləcəyi ehtimal olunur. O, həmçinin qeyd edib ki, bu istiqamətdə beynəlxalq dəstək müəyyən rol oynayır, lakin əsas amil prosesin ardıcıl və fasiləsiz şəkildə davam etdirilməsidir.
Siyasi şərhçi qeyd edib ki, bu narazılıqların mövcudluğu avtomatik olaraq rejim dəyişikliyi ilə nəticələnmir.
