Fransada ordu xidmətə qoşulmaq istəyənlərin sayının kəskin artımı ilə üzləşib. 2026-cı ildə işə salınan yeni könüllü xidmət proqramı gənclər arasında böyük maraq doğurub və müraciətlərin sayı ilk günlərdən mövcud yerləri üstələyib...
Poliqon xəbər verir ki, Le Figaro nəşrinin məlumatına görə, yalnız bir istiqamət üzrə – aviasiyada – təxminən 600 yerə qarşı 800-ə yaxın müraciət daxil olub. Ümumilikdə proqram bir neçə min könüllü üçün nəzərdə tutulsa da, artıq indidən rəqabətin yüksək olacağı görünür. Seçim isə ciddi olaraq qalır: xüsusilə İT, xarici dillər və pilotsuz sistemlərlə işləmə bacarıqları olan namizədlərə üstünlük verilir.
General Arno Qujonun sözlərinə görə, bölmələr 2300-dən çox müraciət qəbul edib, halbuki 2026-cı il üçün cəmi 1800 yer nəzərdə tutulub. Hazırda təxminən 1600 namizəd seçim mərhələsini gözləyir, 260 nəfər isə artıq qəbul olunub.
Müraciət edənlərin təxminən 22 faizini qadınlar təşkil edir. Proqrama 18–25 yaş arası gənclər iyul ayına qədər müraciət edə bilirdilər və xidmət sentyabr-noyabr aylarında başlayacaq. Xidmət müddəti 10 ay olacaq və həm Fransanın materik hissəsində, həm də dənizaşırı ərazilərdə keçiriləcək.
Ekspertlər bu yüksək marağı Avropada təhlükəsizlik vəziyyətinin pisləşməsi və hərbi xidmətə marağın artması ilə əlaqələndirirlər. Fransa hakimiyyəti bunu proqramın genişləndirilməsi üçün siqnal kimi qiymətləndirir: Avropa ölkələrində ordu kadr çatışmazlığı yaşandığı halda, Fransa əks problemlə – motivasiyalı namizədlərin çoxluğu ilə qarşılaşıb.
2026-cı ildə Fransa silahlı qüvvələri 3000 nəfəri xidmətə qəbul etməyi planlaşdırır: 1800 nəfər quru qoşunlarına, 600 nəfər hava-kosmik qüvvələrə və 600 nəfər hərbi-dəniz qüvvələrinə. Gələcəkdə proqramın genişləndirilməsi nəzərdə tutulur – 2027-ci ildə 4000, 2030-cu ildə 10 000 və 2035-ci ilə qədər 42 500 nəfərə çatdırılması planlaşdırılır.
Böyük Britaniya da oxşar istiqamətdə addım ataraq gənclər üçün qısamüddətli xidmət formatı – "gap year" proqramını işə salır. Bu, universitetə qəbuldan əvvəl keçirilən bir illik fasilə dövründə hərbi təcrübə əldə etməyə imkan verir.
Proqram quru qoşunları, donanma və aviasiya daxil olmaqla bütün əsas hərbi sahələri əhatə edir və xidmətlə yanaşı ödənişli təlim də təqdim edir. Beləliklə, iştirakçılar həm hərbi, həm də mülki karyerada faydalı ola biləcək bacarıqlar əldə edirlər.
Layihənin 2026-cı ildə məhdud sayda – təxminən 150 nəfərlə başlanması planlaşdırılır. Maraq yüksək olarsa, proqramın miqyası altı dəfədən çox artırıla bilər. Maliyyə şərtləri adi xidmətlə müqayisə olunur və illik təxminən 30 min avro təşkil edir. Bu model yeni olmasa da, Böyük Britaniya bu sahədə Avstraliyanın uğurlu təcrübəsinə əsaslanır.
Poliqon.info
