ain.az, Xalq qazeti portalına istinadən məlumat verir.
Qarabağ Universitetinin səhnəsində irland pyesi
Çox da böyük olmayan tamaşaçı zalında anşlaqdır. Lojalar da daxil bütün yerlər dolub. Bir azdan işıqlar sönəcək, Xankəndidə ilk dəfə hansısa səhnə əsərinin ilk izləyicisinə çevriləcəyik. Əslində, tamaşa haqqında təəssüratlar da bundan sonra yaranmalıdır. Ancaq indidən heyrət içindəyik.
Qarabağ Universitetinin Beynəlxalq Dil Mərkəzində (BDM) hazırlanmış tamaşaya dəvət alanda çox sevindik. Daha çox həyata keçirilən bərpa-quruculuq fəaliyyəti və qayıdışla gündəmə gətirdiyimiz işğaldan azad olunmuş ərazilərdə mədəni tədbirlərin təşkili gərəkli olduğu qədər də qürurvericidir. Odur ki, böyük həvəslə dəvəti qəbul edib “hadisə yerinə” yollananda səhnədə universitetin incəsənət fakültəsinin tələbələrini izləyəcəyimizi güman edirdik. Lakin tamaşa haqqında aldığımız ilk məlumat bizi təəccübləndirdi: görkəmli irland yazıçısı və şairi, son Viktoriya dövrünün ən məşhur dramaturqlarından, estetika və Avropa modernizminin əsas simalarından biri olan Oskar Uayldın “Dorian Qreyin portreti” adlı əsəri əsasında hazırlanmış tamaşanın aktyorları incəsənət sahəsində təhsil alan gənclər deyil, tibb və sağlamlıq elmləri fakültəsinin birinci kurs tələbələri idilər. Üstəlik, gələcəyin həkimləri tamaşanı elə müəllifin yazdığı dildə – ingilis dilində təqdim edirdilər.
Sən demə, peşəkar yaradıcı kollektiv və teatr səhnəsi, xüsusi səs, işıq effektləri, projektorlar və toplar olmadan da yaxşı tamaşa hazırlamaq, izləyənləri təsirləndirmək mümkün imiş. İstər aparıcıların təqdimatlarda, istərsə də tələbə-aktyorların monoloq və dialoqlarda ingiliscə səlis danışıqları, hiss və emosiyaları çatdırmaq bacarıqları tamaşaçıları elə ilk andan ovsunladı.
Hadisələr finala doğru yaxınlaşdıqca artan alqışlardan da görünürdü ki, Qarabağ Universiteti BDM-nin İngilis dili müəllimi və dilin dərsdənkənar inkişafı üzrə bölmə rəhbəri, filologiya üzrə fəlsəfə doktoru Gülçöhrə Fərhadovanın quruluş verdiyi, ərsəyə gətirdiyi “Dorian Qreyin portreti” tamaşası uğurlu alınıb.
Tamaşa ilə bağlı 2 məqama qısaca toxunmaq istəyirik. Əvvəla, tibb təhsili alan gənclərlə ingilis dilində tamaşa hazırlamaq asan olmadığı qədər, seçilən əsər də cəsarətli yanaşma tələb edir. Axı Oskar Uayldın insanın daxili dünyası ilə ətrafın təfərrüatları, öz məninin portreti ilə psixoloji mübarizədən bəhs edən bu fəlsəfi əsərinə, belə demək mümkünsə, həvəskarların iştirakı ilə səhnə həyatı vermək bir çox peşəkarların belə risk etmədiyi qədər çətindir.
Dorian Qrey yaşca özündən böyük dostu lord Henrinin təsiri ilə heç bir sərhəd tanımayan prinsipsiz və pozğun bir gəncə çevrilir. O, mənəviyyatını əbədi zahiri gözəlliyə dəyişir. Cismi dəyişməz qalır, ruhu isə çürüyür. Onun bütün daxili eybəcərlikləri, şöhrətpərəstliyi, cinayətləri, satqınlığı, təkəbbürü rəssam Bezilin çəkdiyi portretə hopur.
Dorian gənc aktrisa Sibil Veynə vurulur, amma bir az sonra ondan üz döndərir. Buna dözməyən qız zəhər içərək intihar edir. Öz mənəviyyatının güzgüsü olan bu portretə görə Bezilə nifrət edən Dorian Qrey bir gün onu qətlə yetirir və bir tanışının köməyi ilə cəsəddən qurtulur.
Mahir RƏSULOĞLU,XQ-nin Qarabağ müxbiriXankəndi
Daha ətraflı məlumat və yeniliklər üçün ain.az saytını izləyin.
